तरूणीशी सलगी करुन बळजबरीने बलात्कार; विविध कलमान्वये गुन्हा दाखल
नाशिक : २४ वर्षीय तरूणीशी सलगी करीत एकाने बळजबरीने बलात्कार केल्याप्रकरणी आडगाव पोलिस ठाण्यात बलात्कारासह विविध कलमान्वये गुन्हा दाखल करण्यात आला आहे. निखील लोखंडे (३७ रा.धात्रकफाटा) असे संशयिताचे नाव आहे. तरूणीचे लग्न मोडून संशयिताने अश्लिल फोटो व्हायरल करण्याची धमकी दिल्याने हा प्रकार पोलिसात पोहचला. दिंडोरी तालुक्यातील २४ वर्षीय तरूणीने याप्रकरणी तक्रार दाखल केली आहे. तरूणीची २०१६ मध्ये ओळख झाली होती. या ओळखीचे रूपांतर मैत्रीत झाल्याने ही घटना घडली. संशयिताने विवाहीत असतांना तरूणीस शहरातील धात्रक फाटा,कोनर्कनगर व पुणे येथे घेवून जात युवतीवर बळजबरीने बलात्कार केला. यानंतर युवतीच्या कुटुंबियांनी तिचा विवाह जमविण्यासाठी प्रयत्न केला असता त्याने लग्न मोडले. एवढ्यावरच न थांबता संशयिताने तुझा दुसरी पत्नी म्हणून सांभाळ करेल अशी ग्वाही देत तू नकार दिल्यास अश्लिल फोटो व्हायरल करण्याची धमकी दिल्याचे पीडितेने आपल्या तक्रारीत म्हटले आहे. अधिक तपास उपनिरीक्षक सुभाष जाधव करीत आहेत.
काळाराम मंदिरात देवदर्शनासाठी गेलेल्या महिलेच्या पर्स चोरीला
नाशिक : काळाराम मंदिरात देवदर्शनासाठी गेलेल्या महिलेच्या पर्स मधील रोकडसह दागिण्यांवर चोरट्यांनी डल्ला मारला. अंजू नरेंद्र गुप्ता (४५ रा.हरीशाम सदन,चेतनानगर) यांनी याप्रकरणी तक्रार दाखल केली आहेत. गर्दीची संधी साधत चोरट्यांनी ९ हजाराची रोकड आणि सोन्याचे कानातले असा ऐवज लांबविला आहे. याप्रकरणी पंचवटी पोलिस ठाण्यात चोरीचा गुन्हा दाखल करण्यात आला आहे.गुप्ता या रविवारी आषाढी एकादशी निमित्त देवदर्शनासाठी पंचवटीत गेल्या होत्या. दुपारच्या सुमारास काळाराम मंदिर येथे त्या देवदर्शन घेण्यासाठी भाविकांच्या रांगेत उभ्या असतांना ही घटना घडली. अज्ञात चोरट्यांनी गर्दीचा फायदा उचलत त्यांच्या पर्सची चैन उघडून पर्स मधील रोकड व सोन्याचे कानातील असा सुमारे २१ हजार रूपये किमतीचा ऐवज चोरून नेला. अधिक तपास हवालदार शेवाळे करीत आहेत.
