नाशिक : शहरात आत्महत्येचे सत्र सुरूच असून, गुरूवारी (दि.७) वेगवेगळया भागात राहणा-या तिघांनी आत्महत्या केली. त्यात दोन तरूणांसह एका व्यक्तीचा समावेश आहे. मृत तिघाच्या आत्महत्येचे कारण समजू शकले नाही. याप्रकरणी पंचवटी नाशिकरोड आणि सरकारवाडा पोलिस ठाण्यात मृत्यूची नोंद करण्यात आली आहे. मखमलाबाद येथील निखील सुशिल शिंदे (१९ रा.दत्तकृपा बंगला,एरिकेशन कॉलनी म.बाद) या युवकाने बुधवारी (दि.६) सायंकाळच्या सुमारास अज्ञात कारणातून तारवालानगर सिग्नल परिसरात अज्ञात कारणातून विषारी औषध सेवन केले होते. वडिल सुशिल शिंदे यांनी त्यास तात्काळ सिनर्जी हॉस्पिटल येथे दाखल केले असता गुरूवारी उपचार सुरू असतांना त्यास डॉ.कल्पेश सुराणा यांनी मृत घोषीत केले. याप्रकरणी पंचवटी पोलिस ठाण्यात मृत्यूची नोंद करण्यात आली असून अधिक तपास उपनिरीक्षक वाय.एस.माळी करीत आहेत. दुसरी घटना नाशिकरोड भागात घडली. शिवाजी बोधाजी ताजनपुरे (३६ रा.चेहडी,ना.रोड) यांनी बुधवारी दुपारच्या सुमारास आपल्या राहत्या घरी अज्ञात कारणातून विषारी औषध सेवन केले होते. कुटूंबियांनी त्यास तात्काळ जिल्हारूग्णालयात दाखल केले असता उपचार सुरू असतांना त्याचा मृत्यू झाला. याप्रकरणी नाशिकरोड पोलिस ठाण्यात मृत्यूची नोंद करण्यात आली असून अधिक तपास पोलिस नाईक घेगडमल करीत आहेत. तर नागेश जय मोरे (१८ मुळ रा.शेगाव जि.बुलढाणा हल्ली रूंग्ठा शाळे मागे,अशोकस्तंभ) या युवकाने गुरूवारी सकाळच्या सुमारास शाळेच्या पाठीमागील बाथरूम शेजारील पत्र्याच्या रूममध्ये अज्ञात कारणातून लोखंडी पाईपाला दोरी बांधून गळफास लावून घेतला होता. ही बाब निदर्शनास येताच मित्रांनी त्यास जिल्हारूग्णालयात दाखल केले असता वैद्यकीय सुत्रांनी मृत घोषीत केले. याबाबत गौरव बोरचाटे यांनी खबर दिल्याने सरकारवाडा पोलिसात मृत्यूची नोंद करण्यात आली असून अधिक तपास पोलिस नाईक महाले करीत आहेत.
आत्महत्येचे सत्र सुरूच; वेगवेगळया भागात राहणा-या तिघांची आत्महत्या
