वसतीगृहातील रूममधून दोन लॅपटॉप व एमआय नोटबुक चोरीला
नाशिक (इंडिया दर्पण वृत्तसेवा) -महामार्गावरील महालक्ष्मीनगर भागात दरवाजा उघडा असल्याची संधी साधत चोरट्यांनी वसतीगृहातील एका रूममधून दोन लॅपटॉप आणि एमआय नोटबुक चोरून नेल्याची घटना घडली. याप्रकरणी आडगाव पोलिस ठाण्यात चोरीचा गुन्हा दाखल करण्यात आला आहे. लोकेश कैलास वाघ (२२ रा.गुजराती होस्टेल,जत्रा हॉटेल समोर) यांनी याप्रकरणी तक्रार दाखल केली आहे. वाघ हे गुजराती होस्टेल येथे वास्तव्यास असून सोमवारी (दि.२१) सकाळी ते मित्र झोपलेला असल्याने उघडे दार ठेवून दूध घेण्यासाठी गेले असता ही घटना घडली. अज्ञात चोरट्यांनी दरवाजा उघडा असल्याची संधी साधत घरात प्रवेश करून दोन लॅपटॉप व एमआय नोटबुक अल्ट्रा असा ऐवज चोरून नेला. अधिक तपास जमादार वाढवणे करीत आहेत.
तरूणाच्या दमदाटी करुन मोबाईल हिसकाला
नाशिक (इंडिया दर्पण वृत्तसेवा) – बॉईज टाऊन शाळा भागात रस्त्याने पायी जाणा-या तरूणाच्या हातातील मोबाईल तीन जणांनी दमदाटी करीत हिसकावून नेल्याची घटना घडली. याप्रकरणी सरकारवाडा पोलिस ठाण्यात जबरीचोरीचा गुन्हा दाखल करण्यात आला आहे. अथर्व प्रशांत राऊत (१८ रा.मेहर अपा.सिबल हॉटेलमागे) या युवकाने याप्रकरणी तक्रार दाखल केली आहे. राऊत मंगळवारी (दि.२२) सायंकाळच्या सुमारास फोनवर बोलत आपल्या घराकडे पायी जात असतांना ही घटना घडली. बॉईज टाऊन शाळे समोरून तो पायी जात असतांना गप्पा मारत उभ्या असलेल्या तिघांनी त्यास गाठले. यावेळी दमदाटी करीत भामट्यांनी मोबाईल हिसकावून घेत पोबारा केला असून अधिक तपास उपनिरीक्षक पाटील करीत आहेत.
