दोन दुकाने फोडून चोरट्यांनी २१ हजाराचा ऐवज केला लंपास
नाशिक (इंडिया दर्पण वृत्तसेवा) – महामार्गावरील आडगाव मेडिकल चौफुली भागात असलेली दोन दुकाने फोडून चोरट्यांनी रोकडसह डिव्हीआर आणि पितळी पातेले चोरून नेले. याप्रकरणी आडगाव पोलिस ठाण्यात घरफोडीचा गुन्हा दाखल करण्यात आला आहे. नितीन भिकाजी शिंदे (रा.शिंदे वस्ती,आडगाव) यांनी तक्रार दाखल केले आहे. शिंदे यांचे मोडिकल चौफुली भागात योगेश्वर किराणा अ‍ॅण्ड चहाचे दुकान असून शेजारीच शेतकरी चहाचे दुकान आहे. रविवारी (दि.२०) रात्री अज्ञात चोरट्यांनी दोन्ही दुकानांच्या पाठीमागील पत्रा उचकटून चोरट्यांनी दोन्ही दुकानांच्या गल्यातील सुमारे १४ हजार २०० रूपयांची रोकड तसेच हाय कनेक्ट डिव्हीआर आणि चहा दुकानातील पाच किलो वजनाचे पितळी पातेले असा सुमारे २१ हजार १०० रूपये किमतीचा ऐवज चोरून नेला. अधिक तपास हवालदार सुरेश नरवडे करीत आहेत.
बंद वाड्यात शिरून चोरट्यांनी तांब्या पितळीची भांडी चोरली
नाशिक (इंडिया दर्पण वृत्तसेवा) – रविवार कारंजा भागात बंद वाड्यात शिरून चोरट्यांनी तांब्या पितळीची भांडी चोरून नेली. या चोरीप्रकरणी सरकारवाडा पोलिस ठाण्यात गुन्हा दाखल करण्यात आला आहे. प्रकाश कांतालील बेदमुथा (रा. मॉडेल कॉलनी,कॉलेजरोड) यांनी याप्रकरणी तक्रार दाखल केली आहे. बेदमुथा यांचा रविवार कारंजा भागातील हिरालाल लेन मध्ये जुना वाडा आहे. अज्ञात चोरट्यांनी शनिवारी (दि.१९) रात्री वाड्यात प्रवेश करून ही चोरी केली. वाड्यात शिरलेल्या चोरट्यांनी सुमारे सहा हजार रूपये किमतीचे तांबे आणि पितळ या धातूची भांडी चोरून नेली. अधिक तपास हवालदार आहिरे करीत आहेत.
