नाशिक (इंडिया दर्पण वृत्तसेवा) – बसमध्ये चढतांना अथवा गर्दीची संधी साधत चोरट्यांनी पर्स लंपास केल्याच्या दोन घटना घडल्या आहे. याप्रकरणी सरकारवाडा आमि भद्रकाली पोलिस ठाण्यात गुन्हे दाखल करण्यात आले आहेत. पहिली घटना द्वारका भागात घडली. पालखेड ता. निफाड येथील सुशिला दौलतराव थेटे (६२) या वृध्दा सिन्नर येथे जाण्यासाठी व्दारका परिसरातील बस थांब्यावर एसटीची प्रतिक्षा करीत असतांना ही घटना घडली. अज्ञात चोरट्यांनी त्यांच्या पर्समधील १५ हजाराची रोकड हातोहात लांबविली. याप्रकरणी भद्रकाली पोलिस ठाण्यात गुन्हा दाखल करण्यात आला असून अधिक तपास पोलिस नाईक रेहरे करीत आहेत.
दुस-या घटनेत आपल्या आईचे दागिणे बँकेत तारण गहाण करण्यासाठी बाहेरगावी निघालेल्या महिलेच्या पर्स मधील अलंकारांवर भामट्यांनी डल्ला मारला. ही घटना जुने सिबीएस बसस्थानकात घडली. याप्रकरणी चैताली किरण मोहिते (रा.आनंदनगर,सिडको) यांनी तक्रार दाखल केली आहे. मोहिते गेल्या शुक्रवारी (दि.४) त्र्यंबकेश्वर येथे जात असतांना ही घटना घडली. आपल्या आईचे अलंकार पर्स मध्ये ठेवून त्या त्र्यंबकेश्वर येथील बँकेत जाण्यासाठी निघाल्या होत्या. सकाळी अकरा वाजेच्या सुमारास त्या सीबीएस बसस्थानकात त्र्यंबक बसमध्ये चढत असतांना गर्दीची संधी साधत अज्ञात चोरट्यांनी त्यांच्या पर्स मधील ७२ हजाराचे दागिणे हातोहात लांबविले. त्यात कानातील टॉप्स,सोन्याचे पॅण्डल आणि मंगळसुत्र असा ऐवज होता. याप्रकरणी सरकारवाडा पोलिस ठाण्यात गुन्हा दाखल करण्यात आला असून अधिक तपास पोलिस नाईक गांगोडे करीत आहेत.
