नाशिक : औद्योगिक वसाहतीतील शिवाजीनगर भागात विवाहीतेचा छळ करून तिला आत्महत्येस प्रवृत्त केल्याप्रकरणी पतीसह सासरच्या चार जणांना पोलिसांनी अटक केली आहे. माहेरून तीन लाख रूपये आणावे तसेच कारखान्यात कामास जावे या कारणातून ही घटना घडली. याप्रकरणी गंगापूर पोलिस ठाण्यात गुन्हा दाखल करण्यात आला आहे. भास्कर मेंदगे,दुबाई मेंदगे,संतु मेंदगे आणि मनोज मेंदगे (रा.सर्व सोनाई निवास,शिवाजीनगर) अशी अटक केलेल्या संशयितांची नावे आहेत. रविवारी शिल्पा मेंदगे या विवाहीतेने आपल्या राहत्या घरी आत्महत्या केली. तिच्या पालकांनी दिलेल्या तक्रारीवरून शिल्पा हिने माहेरून तीन लाख रूपये आणावेत तसेच कारखान्यात कामास जावे यासाठी सासरच्या मंडळीकडून तिचा मानसिक व शारिरीक छळ सुरू होता. त्यातच रविवारी (दि.३) रात्री पती भास्कर मेंदगे याने तिला मद्याच्या नशेत बेदम मारहाण केल्याने तिने आत्महत्येसारखे टोकाचे पाऊल उचलल्याचे तक्रारीत म्हटले आहे. अधिक तपास सहाय्यक निरीक्षक नितीन पवार करीत आहेत.
