नाशिक : अपघातात मृत झालेल्या महिलेच्या मोबाईलचा वापर करुन बँक खात्यातील साडे सतरा लाख रूपयांची रक्कम परस्पर हडप केल्याचा प्रकार समोर आला आहे. मेव्हण्याच्या तक्रारीवरून अंबड पोलिस ठाण्यात बहिण भावाविरूध्द फसवणुकीचा गुन्हा दाखल करण्यात आला आहे. नेहा सोनटक्के आणि योगेश टिल्लू अशी संशयितांची नावे आहेत. याप्रकरणी नितीन बाळकृष्ण जोशी (५२ रा.आनंद अपा.वजन काट्यामागे,अंबड) यांनी याप्रकरणी तक्रार दाखल केली आहे. जोशी यांच्या पत्नी पल्लवी उर्फ जोत्सना जोशी – टिल्लू (४७) यांचा गेल्या ५ जानेवारी रोजी महामार्गावरील मुंडेगाव फाटा भागात कार अपघातात मृत्यू झाला. मृतदेह शवविच्छेदनासाठी नेला जात असतांना पत्नीची संशयित बहिण आणि भावाने आपल्या पत्नीच्या पर्सचा ताबा घेतला. पर्स मध्ये मोबाईल आणि डायरी होती. डायरीतील शेअर्स मार्केटच्या नोंदीचा अभ्यास करून संशयित भाऊ आणि बहिणीने पत्नीच्या मोबाईलचा वापर करून तिच्या बँक खात्यातील १७ लाख ३० हजार रूपयांची रक्कम परस्पर काढून घेतली. अधिक तपास उपनिरीक्षक पवार करीत आहेत.
