भरधाव चारचाकीने दिलेल्या धडकेत ६८ वर्षीय दुचाकीस्वार ठार
नाशिक (इंडिया दर्पण वृत्तसेवा ) – युनिटन बँक जवळ भरधाव चारचाकीने दिलेल्या धडकेत ६८ वर्षीय दुचाकीस्वार ठार झाल्याची घटना घडली. मंगराज लक्ष्मणदास जैयस्वानी (रा.होलाराम कॉलनी,साधूवासवाणीरोड शरणपूररोड) असे मृत दुचाकीस्वाराचे नाव आहे. याप्रकरणी मुंबईनाका पोलिस ठाण्यात मृत्यूची नोंद करण्यात आली आहे. जैयस्वानी शुक्रवारी (दि.२८) इंदिरानगर भागात गेले होते. दुचाकीने ते आपल्या घराकडे परतत असतांना हा अपघात झाला. इंदिरानगरहून ते शरणपूररोडच्या दिशेने प्रवास करीत असतांना युनियन बँक जवळ त्यांना भरधाव अज्ञात चारचाकीने धडक दिली. या अपघातात ते गंभीर जखमी झाल्याने मुलगा हितेश यांनी नजीकच्या लाईफ केअर हॉस्पिटल येथे दाखल केले होते. उपचार सुरू असतांना वैद्यकीय सुत्रांनी त्यांना मृत घोषीत केले. याबाबत डॉ.त्रिलोक पाटील यांनी खबर दिल्याने मुंबईनाका पोलिस ठाण्यात मृत्यूची नोंद करण्यात आली असून अधिक तपास जमादार आडके करीत आहेत.
२७ वर्षीय विवाहीतीची आत्महत्या
नाशिक (इंडिया दर्पण वृत्तसेवा ) – २७ वर्षीय विवाहीतेने आपल्या राहत्या घरात गळफास लावून घेत आत्महत्या केल्याची घटना जेलरोड परिसरातील राहूलनगर भागात घडली. दिक्षा दिलीप खाडे (रा.राजराजेश्वरी मंगल कार्यालयाजवळ ) असे मृत विवाहीतेचे नाव आहे. खाडे यांच्या आत्महत्येचे कारण समजू शकले नाही. याप्रकरणी नाशिकरोड पोलिस ठाण्यात मृत्यूची नोंद करण्यात आली आहे. दिक्षा खाडे यांनी शुक्रवारी (दि.२८) अज्ञात कारणातून आपल्या राहत्या घरात पंख्यास ओढणी बांधून गळफास लावून घेतला होता. त्यात तिचा मृत्यू झाला. याबाबत मामेसासरे सुभाष साळवे यांनी दिलेल्या खबरीवरून मृत्यूची नोंद करण्यात आली असून अधिक तपास पोलिस नाईक भोळे करीत आहेत.
