नाशिक (इंडिया दर्पण वृत्तसेवा) – भगूर येथे जुन्या वादातून दोघा भावांनी एकास बेदम मारहाण केल्याची घटना घडली. या घटनेत फायटरचा वापर करण्यात आल्याने तरूण जखमी झाला आहे. याप्रकरणी देवळाली कॅम्प पोलिस ठाण्यात गुन्हा दाखल करण्यात आला आहे. राहूल दिपक पाटलेरे व तुषार दिपक पाटलेरे (रा.मोठा गणपती मंदिराजवळ) अशी तरूणास मारहाण करणा-या संशयितांची नावे आहे. याप्रकरणी साईनाथ प्रकाश पंडोरे (३५ रा.मोठा गणपती मंदिराजवळ,भगूर) या युवकाने तक्रार दाखल केली आहे. पंडोरे रविवारी (दि.१६) सायंकाळच्या सुमारास मामे भाऊ संदिप बिरछे यास सोबत घेवून आपल्या घराकडे पायी जात असतांना ही घटना घडली. मोठा गणपती मंदिराजवळून दोघे जात असतांना राहूल पाटलेरे याने वाट अडवित जुन्या वादातून शिवागाळ व जीवे मारण्याची धमकी देत पंडोरे याच्या तोंडावर फायटर मारले तर त्याचा भाऊ तुषार पाटलेरे याने लाथाबुक्यांनी मारहाण केल्याचे तक्रारीत म्हटले असून अधिक तपास जमादार पाचोरे करीत आहेत.
