फोटो स्टुडिओतून चोरट्यांनी दोन कॅमे-यांसह रोकड केली लंपास
नाशिक (इंडिया दर्पण वृत्तसेवा) – वकिलवाडीत फोटो स्टुडिओतून चोरट्यांनी दोन कॅमे-यांसह रोकड चोरून नेल्याची घटना घडली. या चोरीप्रकरणी गोपाल नारायण भगुरे (रा.कालिका मंदिरा मागे) यांनी तक्रार दाखल केली असून सरकारवाडा पोलिस ठाण्यात घरफोडीचा गुन्हा दाखल करण्यात आला आहे. भगुरे यांचा वकिल वाडी कॉर्नरला एका वाड्यात फोटो स्टुडिओ असून शनिवारी (दि.१५) रात्री ही घटना घडली. स्टुडिओचे प्लाऊड सरकवून चोरट्यांनी ही चोरी केली. स्टूडिओत शिरलेल्या चोरट्यांनी दुकानातील दोन कॅमेरे आणि गल्यातील साडे चार हजार रूपयांची रक्कम असा सुमारे ५४ हजार ५०० रूपयांचा ऐवज चोरून नेला. अधिक तपास हवालदार आहिरे करीत आहेत.
विषारी औषध सेवन करून तरुणाची आत्महत्या
नाशिक (इंडिया दर्पण वृत्तसेवा) – ४२ वर्षीय व्यक्तीने विषारी औषध सेवन करून आत्महत्या केल्याची घटना पंचवटीतील कुमावत नगर भागात घडली. अमित सुरेश नाईक असे आत्महत्या करणा-या इसमाचे नाव आहे. नाईक याच्या आत्महत्येचे कारण समजू शकले नाही. याप्रकरणी पंचवटी पोलिस ठाण्यात मृत्यूची नोंद करण्यात आली आहे. नाईक यांनी गुरूवारी (दि.१३) रात्री अज्ञात कारणातून आपल्या राहत्या घरात विषारी औषध सेवन केले होते. कुटुंबियांनी त्यास तात्काळ गंगापूररोड येथील सिध्दीविनायक हॉस्पिटल येथे दाखल केले होते. उपचार सुरू असतांना रविवारी (दि.१६) त्यास डॉ.जिंतेंद्र गुरव यांनी मृत घोषीत केले. अधिक तपास पोलिस नाईक कोरडे करीत आहेत.
