नाशिक (इंडिया दर्पण वृत्तसेवा) -आगामी धार्मिक सण-उत्सव यासह विविध संघटनांकडून होणारी निदर्शने, आंदोलने यामुळे शहर-जिल्ह्यातील कायदा व सुव्यवस्था बिघडू नये यासाठी पोलिस आयुक्त जयंत नाईकनवरे यांनी १६ ते ३० ऑक्टोबर दरम्यान महाराष्ट्र पोलिस कायद्यानुसार शहर आयुक्तालय हद्दीमध्ये मनाई आदेश लागू केला आहे. सध्या सणउत्सव सुरू आहेत. तसेच, राजकीय पक्षांमध्ये आरोप-प्रत्यारोप होत आहेत. पीएफआयवर एनआयएने केलेल्या कारवाईच्या निषेधार्थ प्रतिक्रिया उमटत आहेत. या पार्श्वभूमीवर शहरात शांतता कायम राहावी यासाठी पोलिस आयुक्त नाईकनवरे यांनी १६ ते ३० ऑक्टोबर यादरम्यान शहरात मनाई आदेश लागू केला आहे. या आदेशात नागरिकांना कोणतेही दाहक किंवा स्फोटक पदार्थ तसेच दगड, शस्त्र, लाठया, अग्निशस्त्र (बंदूक -पिस्तूल) बागळता येणार नाही. कोणत्याही व्यक्तीचे प्रतिकात्मक प्रेताचे किंवा प्रतिमेचे प्रदर्शन किंवा दहन करता येणार नाही. आरडाओरड, वाद्य वाजवण्यास बंदी असेल. प्रक्षोभक भाषण, वर्तवणूकीस बंदी घालण्यात आली आहे. सार्वजनिक ठिकाणी महाआरती करणे, वाहनांवर झेंडे लावून फिरणे, पेढे वाटणे, फटाके फोडणे, घंटानाद करणे, शेरेबाजी करण्यासही बंदी घालण्यात आली आहे. पुर्वपरवानगी शिवाय पाच किंवा पाचपेक्षा जास्त नागरिकांना एकत्र जमण्यास, सभा घेण्यास किंवा मिरवणूक काढण्यास बंदी घालण्यात आली आहे. या आदेशांचे उल्लंघन करणारे महाराष्ट्र पोलिस कायदा १९५१ चे कलम १३५ नुसार शिक्षेस पात्र राहतील असा इशारा देण्यात आला आहे.
