नाशिक (इंडिया दर्पण वृत्तसेवा) – कारचालकासह कुटुंबिय देवदर्शनासाठी गेले असता गडकरी चौक परिसरात पार्क केलेल्या कारची काच फोडून चोरट्यांनी साऊंडसिस्टीम,मागील सिटासह अन्य ऐवज लंपास केले. या चोरीप्रकरणी प्रमोद लक्ष्मण लोखंडे (रा.हनुमानवाडी) यांनी तक्रार दाखल केली आहे. लोखंडे कुटुंबिय मंगळवारी सकाळच्या सुमारास देवदर्शनासाठी मुंबईनाका भागात गेले होते. चांडक सर्कलच्या दिशेने जाणा-या मार्गावरील एलआयसी ऑफिस समोर लोखंडे यांनी कार पार्क केली. त्यानंतर ते ग्रामदैवत कालिका माता मंदिरात दर्शनासाठी गेले. कार चालक दर्शनाला गेल्याची संधी साधत अज्ञात चोरट्यांनी पार्क केलेल्या कारची खिडकीची काच फोडून कारमधील म्युझिक सिस्टीम, मागील सीट, डिक्ससह स्टेपनी, टूलबॉक्स आणि बेडसिट असा सुमारे ३५ हजाराचा ऐवज चोरून नेले. लोखंडे कुटुंबिय देवदर्शन आटोपून कारजवळ परतले असता ही घटना निदर्शनास आली. याप्रकरणी मुंबईनाका पोलिस ठाण्यात चोरीचा गुन्हा दाखल करण्यात आला आहे. अधिक तपास हवालदार टेमगर करीत आहेत.
