बसमधून प्रवासात महिलेच्या पर्समधील दीड लाखाची रोकड चोरीला

बसमधून प्रवासात महिलेच्या पर्समधील दीड लाखाची रोकड चोरीला
नाशिक – चंडीकापूर फाटा ते म्हसरूळ दरम्यानच्या प्रवासात बसमधून प्रवास करीत असतांना महिलेच्या पर्समधील दीड लाखाची रोकड चोरट्यांनी लंपास केली. या चोरीप्रकरणी खुशाली पुंडलीक बागुल (रा.पिंगळे मळा,मखमलाबाद शिवार पेठरोड) यांनी तक्रार दाखल केली असून म्हसरूळ पोलिस ठाण्यात चोरीचा गुन्हा दाखल करण्यात आला आहे. बागुल बुधवारी दिंडोरी तालुक्यातील चंडीकापूर येथे गेल्या होत्या. चंडीकापूर फाटा ते म्हसरूळ दरम्यानच्या प्रवासात ही घटना घडली. बस प्रवासात अज्ञात चोरट्यांनी त्यांच्या बॅगेतील पर्स चोरून नेली. यापर्स मध्ये एक लाख ४० हजाराची रोकड होती. अधिक तपास हवालदार रोकडे करीत आहेत.
……….
दोन दुचाकी चोरीला
नाशिक : शहरात मोटारसायकल चोरीची मालिका सुरू असून नुकत्याच दोन दुचाकी चोरट्यांनी चोरून नेल्या. याप्रकरणी पंचवटी आणि अंबड पोलिस ठाण्यात गुन्हे दाखल करण्यात आले आहेत. पेठफाटा भागातील अंकुश राजेंद्र थोरात (रा.एरंडवाडी) हे गेल्या रविवारी (दि.२६) सायंकाळी गोदाघाटावरील रामकुंड भागात गेले होते. साई किरण धाम या दुकानासमोर पार्क केलेली त्यांची शाईन एमएच १५ इआर ०४८९ दुचाकी चोरट्यांनी चोरून नेली. याप्रकरणी पंचवटी पोलिस ठाण्यात गुन्हा दाखल करण्यात आला असून अधिक तपास पोलिस नाईक वाघमारे करीत आहेत. दुसरी घटना कामटवाडा भागात घडली. गुलाबराव नारायण सुर्यवंशी (रा.शिवशक्ती नगर त्रिमुर्तीचौक) हे गेल्या ९ मे रोजी सायंकाळच्या सुमारास कामटवाडा भागात गेले होते. धन्वंतरी मेडिकल कॉलेज परिसरात पार्क केलेली त्यांची स्प्लेंडर एमएच १५ ईटी १५६५ चोरट्यांनी चोरून नेली. याप्रकरणी अंबड पोलिस ठाण्यात गुन्हा दाखल करण्यात आला असून अधिक तपास उपनिरीक्षक पावरा करीत आहेत.