नाशिक : शहरात वेगवेगळया भागातून पाच दुचाकी चोरट्यांनी पळवून नेल्याच्या घटना घडल्या आहे. याप्रकरणी पंचवटी, आडगाव, गंगापूर, अंबड व उपनगर पोलिस ठाण्यात गुन्हे दाखल करण्यात आले आहेत. पहिली घटना सिडकोतील बुरकुले हॉल भागात घडली. साईबाबानगर भागात राहणारे ठगा कारभारी कोल्हे (रा.महाकाली चौक) हे शनिवारी (दि.२५) दुपारच्या सुमारास संभाजी स्टेडीअम भागात गेले होते. बुरकुले हॉलजवळील पार्किंगमध्ये त्यांनी आपली एमएच १५ जीएच ८३५६ मोटारसायकल पार्क केली असता ती चोरट्यांनी चोरून नेली. याप्रकरणी अंबड पोलिस ठाण्यात गुन्हा दाखल करण्यात आला असून हवालदार शेख तपास करीत आहेत. तर दुस-या घटनेत वडनेर दुमाला येथील बिहारी यदू रॉय (रा.शिवराजनगर,पाथर्डी रोड) हे सोमवारी (दि.२७) सायंकाळी देवळाली गावातील सोमवार बाजारात गेले असता सार्वजनिक शौचालयाजवळ लावलेली त्यांची पॅशन प्रो एमएच १५ डीपी ९६८३ चोरट्यांनी पळवून नेली. याप्रकरणी उपनगर पोलिस ठाण्यात नोंद करण्यात आली असून हवालदार सातभाई तपास करीत आहेत. तिस-या घटनेत हिरावाडीतील वनिता मनोहर पेखळे (रा.दामोदरनगर) या मंगळवारी (दि.२८) सकाळच्या सुमारास परिसरातील सप्तशृंगी हॉस्पिटल येथे गेल्या होत्या. रूग्णालया समोर पार्क केलेली त्यांची अॅक्टीव्हा एमएच १५ एफजे ५५३६ चोरट्यांनी चोरून नेली. याप्रकरणी पंचवटी पोलिस ठाण्यात गुन्हा दाखल करण्यात आला असून पोलिस नाईक खाजेकर तपास करीत आहेत. चौथी घटना औरंगाबादरोड भागात घडली. आशिष दत्तू चौरे (रा.साई हाईटस,निलगिरीबाग,कैलासनगर) यांची केटीएम दुचाकी एमएच ३९ एक्स ०७६७ त्यांच्या सोसायटीच्या पार्किंगमध्ये लावलेली असतांना चोरट्यांनी ती पळवून नेली. ही घटना रविवारी (दि.२६) रात्री घडली. याप्रकरणी आडगाव पोलिस ठाण्यात गुन्हा दाखल करण्यात आला असून हवालदार लोहकरे तपास करीत आहेत. पाचवी घटना उंटवाडी भागात घडली. विकास मनोहर तर्खडकर (रा.सरला अपा.शरणपूररोड) हे गेल्या गुरूवारी (दि.२३) उंटवाडीतील सीटी सेंटर मॉल भागात गेले होते. मॉल पाठीमागील मोकळया जागेत पार्क केलेली त्यांची अॅक्टीव्हा एमएच १५ जीएस ५४६९ चोरट्यांनी चोरून नेली. याप्रकरणी गंगापूर पोलिस ठाण्यात नोंद करण्यात आली असून पोलिस नाईक मोरे तपास करीत आहेत.
दुचाकी चोरीचे सत्र सुरुच; वेगवेगळया भागातून पाच दुचाकी चोरीला
