बनावट चावीने घर उघडून चोरट्यांनी ८० हजाराची रोकड चोरुन नेली
नाशिक – औरंगाबादरोड वरील स्वामी समर्थनगर भागात बनावट चावीने घर उघडून चोरट्यांनी ८० हजाराची रोकड चोरून नेल्याची घटना घडली. शिला संजय जोशी (रा. समाधान स्विट मागे, स्वामी समर्थनगर) यांनी याप्रकरणी तक्रार दाखल केली आहे. याप्रकरणी आडगाव पोलिस ठाण्यात चोरीचा गुन्हा दाखल करण्यात आला आहे. जोशी कुटुंबिय गेल्या शुक्रवारी बाहेरगावी गेले असता ही घटना घडली. अज्ञात चोरट्यांनी बनावट चावीने बंद घराचे कुलूप उघडून कपाटातील पर्स मध्ये ठेवलेली ८० हजाराची रोकड चोरून नेली. उपनिरीक्षक जाधव तपास करीत आहेत.
महिलेच्या गळयातील सोन्याची पोत दुचाकीस्वार त्रिकुटाने ओरबाडून नेली
नाशिक : पाथर्डी फाटा भागात रस्त्याने पायी जाणा-या महिलेच्या गळयातील सोन्याची पोत दुचाकीस्वार त्रिकुटाने ओरबाडून नेल्याची घटना घडली. . वैशाली शरद कहांडळ (रा. अंजनी सोसा. निसर्ग कॉलनी) यांनी याप्रकरणी तक्रार दाखल केली आहे. याप्रकरणी इंदिरानगर पोलिस ठाण्यात जबरीचोरीचा गुन्हा दाखल करण्यात आला आहे. अंजनी सोसायटीसमोरून कहाडंळ पायी जात असतांना समोरून दुचाकीवर आलेल्या तीन जणांपैकी एकाने त्यांच्या गळयातील सुमारे ४० हजार रूपये किमतीची सोन्याची पोत ओरबाडून नेली. मंगळवारी ही घटना घडली. या चोरीचा सहाय्यक निरीक्षक सय्यद तपास करीत आहेत.
