नाशिक : शहरात शुक्रवारी दोन आत्महत्याच्या घटना घडल्या आहे. हे दोघेही शहरातील वेगवेगळ्या भागात राहत होते. याप्रकरणी आडगाव आणि अंबड पोलिस ठाण्यात मृत्यूची नोंद करण्यात आली आहे. दोघांच्याही आत्महत्येचे कारण समजू शकले नाही. पहिली घटना आडगाव येथे घडली. शिवाजी कारभारी माळोदे (४१ रा.माळोदे वस्ती,शेरताटीरोड) यांनी शुक्रवारी दुपारच्या सुमारास अज्ञात कारणातून आपल्या राहत्या घरी विषारी औषध सेवन केले होते. ही बाब निदर्शनास येताच कुटुंबियांनी त्यांना तात्काळ आडगाव मेडिकल कॉलेज येथे दाखल केले असता उपचार सुरू असतांना वैद्यकीय सुत्रांनी मृत घोषीत केले. याबाबत आडगाव पोलिस ठाण्यात मृत्यूची नोंद करण्यात आली असून अधिक तपास हवालदार बस्ते करीत आहेत. चंद्रकांत नारायण आहिरे (१८ रा.सावतानगर,सिडको) या युवकाने शुक्रवारी सायंकाळच्या सुमारास अज्ञात कारणातून आपल्या राहत्या घरी पंख्यास दोरी बांधून गळफास लावून घेतला होता. त्यात त्याचा मृत्यू झाला. याबाबत केतन पाटील यांनी दिलेल्या खबरीवरून अंबड पोलिस ठाण्यात मृत्यूची नोंद करण्यात आली असून अधिक तपास हवालदार परदेशी करीत आहेत.
आत्महत्येचे सत्र सुरुच; शहरात वेगवेगळ्या भागात दोन आत्महत्या
