श्रमिकनगर भागात घरफोडी; दोन लाखाचा ऐवज चोरट्यांनी केला लंपास
नाशिक : घरफोडीत चोरट्यांनी सुमारे दोन लाखांच्या ऐवज लंपास केल्याची घटना औद्योगीक वसाहतीतील श्रमिकनगर भागात घडली. या घरफोडीत रोकडसह सोन्याचांदीच्या दागिण्यांचा समावेश आहे. याप्रकरणी सातपूर पोलिस ठाण्यात घरफोडीचा गुन्हा दाखल करण्यात आला आहे. सचिन देवराम बुटाले (रा.आयटीआय कॉलनी) यांनी याप्रकरणी तक्रार दाखल केली आहे. बुटाले कुटुंबिय बुधवारी (दि.१७) बाहेरगावी गेले असता ही घटना घडली. अज्ञात चोरट्यांनी बंद घराचा कडीकोयंडा तोडून बेडरूममधील लोखंडी कपाटातील लॉकरमधून रोकड व सोन्याचांदीचे दागिणे असा सुमारे २ लाख ४ हजार रूपये किमतीचा ऐवज चोरून नेला. अधिक तपास सहाय्यक निरीक्षक पठाण करीत आहेत.
झाडास गळफास लावून हिरावाडी भागात तरुणाची आत्महत्या
नाशिक : मंदिराच्या बगीच्यातील झाडास गळफास लावून हिरावाडी भागात राहणा-या २४ वर्षीय तरूणाने आत्महत्या केली. मोहन सोमनाथ वाडेकर (रा.भगवतीनगर, हिरावाडी) असे मृत युवकाचे नाव आहे.सदर युवकाच्या आत्महत्येचे कारण समजू शकले नाही. याप्रकरणी पंचवटी पोलिस ठाण्यात मृत्यूची नोंद करण्यात आली आहे. वाडेकर याने गुरूवारी (दि.१८) आपल्या घराजवळील तुळजा भवानी मंदिराच्या गार्डनमध्ये अज्ञात कारणातून एका झाडाला दोरी बांधून गळफास लावून घेतला होता. त्यात त्याचा मृत्यू झाला. सोमनाथ वाडेकर यांनी दिलेल्या खबरीवरून पोलिस दप्तरी मृत्यूची नोंद करण्यात आली असून अधिक तपास हवालदार वनवे करीत आहेत.
