नाशिक : वावरेनगर कडून त्या आयटीआय सिग्नलच्या दिशेने प्रवास करीत असतांना सहेली साडी दुकानासमोर पाठीमागून भरधाव आलेल्या अ‍ॅपेरिक्षाने दुचाकीस जोरदार धडक दिल्याने दुचाकीस्वार महिला जखमी झाली. या अपघातात महिलेस गंभीर दुखापत झाली असून तिच्या पतीने दिलेल्या तक्रारीवरून अ‍ॅपे चालकाविरूध्द अंबड पोलिस ठाण्यात गुन्हा दाखल करण्यात आला आहे. गणेश रमेश जाधव (३० रा.महालक्ष्मीनगर,डीजीपीनगर) असे गुन्हा दाखल करण्यात आलेल्या रिक्षाचालकाचे नाव असून याप्रकरणी सोमनाथ आहिरे (रा.सरस्वती विद्यालयाजवळ,कामठवाडे) यांनी तक्रार दाखल केली आहे. आहिरे यांच्या पत्नी गेल्या रविवारी दुपारच्या सुमारास एमएच १५ एचएफ २५०४ या मोपेड दुचाकीवर प्रवास करीत असतांना हा अपघात झाला होता. या अपघातात आहिरे जखमी झाल्या असून त्यांच्यावर उपचार सुरू आहेत. अधिक तपास पोलिस नाईक देशमुख करीत आहेत.
