बांधकाम साईटवरून पडल्याने ३५ वर्षीय कामगाराचा मृत्यू

नाशिक – सदगुरूनगर भागात बहुमजली इमारतीच्या बांधकाम साईटवरून पडल्याने ३५ वर्षीय कामगाराचा मृत्यू उपचारा दरम्यान झाला आहे. गेले २० ते २२ दिवस कामगारावर उपचार सुरू होते. समाधान निवृत्ती बेंडकुळे (रा.खरकळ ता.त्र्यंबकेश्वर) असे मृत कामगाराचे नाव आहे. याप्रकरणी सातपूर पोलिस ठाण्यात मृत्यूची नोंद करण्यात आली आहे. बेंडकुळे गेल्या १३ जुलै रोजी सदगुरूनगर येथील नव्याने सुरू असलेल्या बांधकाम साईटवर काम करीत असतांना ही घटना घडली होती. काम करीत असतांना अचानक तोल गेल्याने तो दुस-या मजल्यावरून जमिनीवर कोसळला होता. या घटनेत गंभीर दुखापत झाल्याने त्यास तात्काळ परिसरातील हॉस्पिटलमध्ये दाखल करण्यात आले होते. त्यानंतर त्यास आडगाव येथील मेडिकल कॉलेज येथे हलविण्यात आले असता शनिवारी (दि.६) उपचार सुरू असतांना डॉ.प्रितम जयस्वाल यांनी त्यास मृत घोषीत केले. अधिक तपास हवालदार बेंडकुळे करीत आहेत.