ओझर ( इंडिया दर्पण वृत्तसेवा ) – लहान मुलींचे अपहरण करून परराज्यात विकणा-या टोळीला पकडण्यात ओझर पोलिसांना यश आले आहे. या टोळीतील चार आरोपींना पोलिसांनी गजाआड केले असून त्यात दोन महिला तर दोन पुरूषांचा समावेश आहे. विशेष म्हणजे यामध्ये ओझर शहरातील एका महिलेचा देखील समावेश असल्याची माहिती समोर आली आहे. या टोळीने ज्या मुलींचे अपहरण केले होते. त्या सर्व दहा ते बारा वयोगटातील आहेत. पकडलेल्या टोळीने पंचवटी, सातपूर, फुलेनगर इथल्या मुलींना फूस लावून पळवून नेण्याची कबुली दिली आहे.
ओझरमध्ये दोन महिन्यात दोन मुलींचे अपहरण झाले होते. त्यामुळे पोलिस या अपहरणाचा तपास सुरु केला होता. त्यासाठी या मोहिमेला मुस्कान असे नाव देण्यात आले होते. या टोळीला पकडण्यासाठी ओझर गुन्हे शोध पथक पाच दिवस गुजरात आणि मध्यप्रदेशमध्ये तळ ठोकून होते. त्यानंतर त्यांच्या हाती ही टोळी लागली. टोळीमधील ओझरमधील एक महिला पैशांसाठी हे सर्व करत असल्याची माहिती या टोळीला पकडल्यानंतर समोर आली आहे. ओझर पोलीस गुन्हे शोध पथकाने या आरोपींना अटक केली असून या टोळीकडून इतर गुन्हयाचा तपास सुध्दा केला जाणार आहे.
