नाशिक (इंडिया दर्पण वृत्तसेवा) – नाशिकरोड येथील जयभवानी रोड परिसरात रात्री साडेबाराच्या सुमारास घरफोडी घटना घडली. या घरफोडीत चोरट्यांना ज्या फ्लॅटमध्ये चोरी करायची होती त्या घरात काहीच न मिळाल्यामुळे त्यांनी शेजारचे घर फोडून लाखो रुपयांचे दागिने लंपास केले. उपनगर पोलीस ठाण्याच्या या घरफोडीचा गुन्हा दाखल झाला आहे, चोरी करणाऱ्या तीन चोरांपैकी एक जण सीसीटीव्ही कॅमेऱ्यात कैद झाला आहे.
दुचाकी चोऱ्याही वाढल्या
शहरातील वेगवेगळया भागातून नुकत्याच दोन दुचाकी चोरट्यानी पळवून नेल्याच्या घटना घडल्या आहे. याप्रकरणी म्हसरूळ आणि सातपूर पोलिस ठाण्यात गुन्हे दाखल करण्यात आले आहेत. दिंडोरी रोडवरील महेंद्र किसनराव खरे (५० रा. मंगलमुर्ती अपा. प्रभातनगर) यांची दुचाकी एमएच १५ बीक्यू ६८५३ गेल्या २७ मार्च ते ४ एप्रिल दरम्यान त्यांच्या सोसायटीच्या पार्किंगमध्ये लावलेली असतांना चोरट्यांनी ती पळवून नेली. याप्रकरणी म्हसरूळ पोलिस ठाण्यात गुह्याची नोंद करण्यात आली आहे.
दुसरी घटना सातपूर येथील एसआयसी हॉस्पिटल भागात घडली. विकी विजय बांगर (रा. क्रांतीचौक, गंगापूरगाव) हे ३१ मार्च रोजी सातपूर येथील आरोग्य जीवन विमा रूग्णालयात गेले होते. रूग्णालयाच्या पार्किंगमध्ये लावलेली त्यांची एमएच १५ ईडी ७२२२ दुचाकी चोरट्यांनी चोरून नेली. याप्रकरणी सातपूर पोलिस ठाण्यात गुन्हा दाखल करण्यात आला आहे.
