एकतर्फी प्रेमातून घरात घुसून
अल्पवयीन मुलीचा विनयभंग; तरुण गजाआड
नाशिक (इंडिया दर्पण वृत्तसेवा) -: सिडकोत एकतर्फी प्रेमातून घरात घुसून कुटूंबियांना जातीवाचक शिवीगाळ करीत एकाने अल्पवयीन मुलीचा विनयभंग केल्याची घटना घडली. या प्रकरणी पोलिसांनी संशयितास गजाआड केले आहे. विशाल सुभाष शेलार (२८ रा. एकता चौक,राणेनगर) असे अटक करण्यात आलेल्या संशयिताचे नाव आहे. याप्रकरणी अंबड पोलिस ठाण्यात विनयभंग आणि अनुसूचित जाती जमाती अधिनियम (अ‍ॅट्रोसिटी) कायद्यान्वये गुन्हा दाखल करण्यात आला आहे.
संशयित आणि पीडिता एकाच भागातील रहिवासी असून शेलार गेल्या काही महिन्यांपासून अल्पवयीन मुलीचा पाठलाग करीत होता. एकतर्फी प्रेमातून त्याने गुरूवारी (दि.९) दुपारच्या सुमारास मुलीचे घर गाठून तिच्याकडे प्रेमाची मागणी केली होती. मात्र मुलीने नकार दिला. त्यामुळे संतप्त युवकाने दुस-या दिवशीही तिचे घर गाठत कुटुंबियांना जातीवाचक शिवीगाळ करीत मुलीचा विनयभंग केला. यावेळी त्याने माझ्याशी संबध ठेवले नाही तर तुमचा बेत पाहतो अशी धमकी दिल्याने मुलीने पोलिसात धाव घेतली असून संशयितास अटक करण्यात आली आहे. अधिक तपास सहाय्यक आयुक्त सोहेल शेख करीत आहेत.
पार्किंगमध्ये लावलेली प्लेझर दुचाकी चोरट्यांनी चोरून नेली
नाशिक (इंडिया दर्पण वृत्तसेवा) – :पार्किंगमध्ये लावलेली प्लेझर दुचाकी चोरट्यांनी चोरून नेल्याची घटना रेल्वेस्टेशन भागातील देवी चौक घडली. या चोरीप्रकरणी राहूल देविदास पाटील (४२ रा.शर्वरी पार्क,सौभाग्यनगर) यांनी तक्रार दाखल केली असून नाशिकरोड पोलिस ठाण्यात चोरीचा गुन्हा दाखल करण्यात आला आहे.
पाटील गेल्या गुरूवारी (दि.२) दुपारच्या सुमारास रेल्वेस्थानक भागात गेले होते. देवी चौकातील पार्किंगमध्ये त्यांनी आपली प्लेझर एमएच १५ ईडी ०५३० पार्क केली असता ही घटना घडली. अज्ञात चोरट्यांनी पार्किंगमध्ये लावलेली दुचाकी चोरून नेली. अधिक तपास पोलिस नाईक घेगडमल करीत आहेत.
