नाशिक (इंडिया दर्पण वृत्तसेवा) – सिडकोतील उषा हॉस्पिटल भागात फोनवर बोलत रस्त्याने पायी जाणा-या तरूणाच्या हातातील मोबाईल दुचाकीस्वार भामट्यांनी हिसकावून नेल्याची घटना घडली. याप्रकरणी अंबड पोलिस ठाण्यात जबरी चोरीचा गुन्हा दाखल करण्यात आला आहे. मुळचा म्हसदी जि. धुळे येथील राहूल अरविंद बेडसे (२६ हल्ली रा. काकडे मळा, अशोकनगर) या युवकाने तक्रार दाखल केली आहे.
बेडसे मंगळवारी (दि.१५) सिडको भागात राहणाऱ्या नातेवाईकांना भेटण्यासाठी आला होता. रात्री आठ वाजेच्या सुमारास महामार्गाच्या सर्व्हिस रोडने तो फोनवर बोलत पायी रिक्षा स्टॅण्डच्या दिशेने पायी जात असतांना ही घटना घडली. पाठीमागून दुचाकीवर आलेल्या भामट्यांनी त्याच्या हातातील सुमारे ११ हजार रूपये किमतीचा मोबाईल हिसकावून पोबारा केला. अधिक तपास उपनिरीक्षक शेख करीत आहेत.
कोयत्याचा धाक दाखवित दहशत निर्माण करणा-या सराईतास पोलिसांनी केले गजाआड
रविवार बाजार भागात कोयत्याचा धाक दाखवित दहशत निर्माण करणा-या सराईतास पोलिसांनी गजाआड केले आहे. सुनिल उर्फ बारक्या यशवंत पगारे (३७ रा. भैरवनाथ नगर, संसरीगाव) असे अटक करण्यात आलेल्या सराईत कोयताधारीचे नाव असून तो पोलिस रेकॉर्डवरील गुन्हेगार आहे. त्याच्या ताब्यातून धारदार कोयता हस्तगत करण्यात आला आहे.
याप्रकरणी देवळाली कॅम्प पोलिस ठाण्यात शस्त्रबंदी कायद्यान्वये गुन्हा दाखल करण्यात आला आहे. देवळाली कॅम्प येथील रविवार बाजार भागात संशयित कोयत्याचा धाक दाखवून नागरिकांमध्ये दहशत पसरवित असल्याची माहिती पोलिसांना मिळाली होती. त्यानुसार गुरूवारी (दि. १७) सायंकाळी पोलिसांनी धाव घेतली असता नागझरी नाल्याजवळ संशयित मिळून आला. त्याच्या अंगझडतीत धारदार कोयता मिळून आला असून याप्रकरणी पोलिस नाईक सुभाष जाधव यांनी फिर्याद दिली आहे. अधिक तपास हवालदार जगदाळे करीत आहेत.
Nashik City Crime Police Theft dacoity murder suicide fight beaten
