नाशिक (इंडिया दर्पण वृत्तसेवा) – पळसे येथे टायर दुकान फोडून चोरट्यांनी सुमारे दोन लाखाचा ऐवज लंपास केला. या चोरीत दुकानातील टायर,जॅक सीसीटिव्ही मशिन आणि गल्यातील रक्कम चोरीला गेले आहे. याप्रकरणी नाशिकरोड पोलिस ठाण्यात गुन्हा दाखल करण्यात आला आहे. खंडू मसाजी खंडारे (रा.भांगरे मळा,म्हसोबा मंदिराशेजारी कॅनलरोड,शिंदे) यांनी याप्रकरणी तक्रार दाखल केली आहे.
खंडारे यांचे पळसेगावात समृध्दी टायर्स नावाचे दुकान आहे. शनिवारी (दि.२२) रात्री ही घटना घडली. अज्ञात चोरट्यांनी त्यांच्या बंद दुकानाचे शटर वाकवून दुकानाच्या गल्यातील रोकड,टायर,जॅक व सिसीटिव्ही यंत्रणा असा सुमारे दोन लाख २०० रूपये किमतीचा ऐवज चोरून नेला. अधिक तपास सहाय्यक निरीक्षक शेळके करीत आहेत.
वेगवेगळया भागातून दोन दुचाकी चोरीला
शहरात असून वेगवेगळया भागातून नुकत्याच दोन दुचाकी चोरट्यांनी चोरून नेल्या. याप्रकरणी पंचवटी आणि उपनगर पोलिस ठाण्यात चोरीचे गुन्हे दाखल करण्यात आले आहेत. रासबिहारी लिंक रोड भागात राहणारे शुबम राजेंद्र येटाळ हे रविवारी (दि.२३) जुना आडगाव नाका भागात गेले होते. राजभोग थाळी समोर त्यांनी आपली अ‍ॅक्टीव्हा एमएच १२ पीयू ७१०६ पार्क केली असता चोरट्यांनी ती पळवून नेली.
याप्रकरणी पंचवटी पोलिस ठाण्यात गुह्याची नोंद करण्यात आली असून अधिक तपास जमादार वनवे करीत आहेत. दुसरी घटना आर्टिलरी सेंटर भागात घडली. मनोहर पांडूरंग काळे (रा.जलराम ज्योत बिल्डींग,आर्टिलरी सेंटर गेट जवळ ना.रोड) यांनी याबाबत तक्रार दाखल केली आहे. काळे यांची अ‍ॅक्टीव्हा शनिवारी (दि.२२) रात्री त्यांच्या सोसायटीच्या पार्किंगमध्ये लावलेली असतांना ती चोरट्यांनी चोरून नेली. याप्रकरणी उपनगर पोलिस ठाण्यात गुह्याची नोंद करण्यात आली असून अधिक तपास हवालदार निमसे करीत आहेत.
