नाशिक (इंडिया दर्पण वृत्तसेवा) – पांडवलेणी बघण्यासाठी आलेल्या पर्यटक तरूणाच्या कारमधील लॅपटॉप चोरट्यांनी चोरून नेल्याची घटना घडली. याप्रकरणी प्रसाद साहेबराव साळुंखे (२३ मुळ रा.सावकारवाडी ता.मालेगाव हल्ली शिरसगाव, अहमदनगर) या युवकाने तक्रार दाखल केली असून इंदिरानगर पोलिस ठाण्यात चोरीचा गुन्हा दाखल करण्यात आला आहे.
साळुंखे रविवारी (दि.६) पर्यटनानिमित्त शहरात आले होते. दुपारी फाळके स्मारक बघून ते पांडवलेणी डोंगरावर फिरण्यासाठी गेले असता ही घटना घडली. अज्ञात चोरट्यांनी पांडवलेणी पायथ्याशी पार्क केलेल्या त्यांच्या कारचा दरवाजा कश्याने तरी उघडून पाठीमागील आसनावर ठेवलेला सुमारे २५ हजार रूपये किमतीचा लॅपटॉप चोरून नेला. अधिक तपास हवालदार गांगुर्डे करीत आहेत.
चुंचाळे शिवारात युवकाची आत्महत्या
१८ वर्षीय युवकाने आपल्या राहत्या घरात गळफास लावून घेत आत्महत्या केली. औद्योगीक वसाहतीतील चुंचाळे शिवारात तो राहत होता. निलेश शिवराम वाजे (१८ रा.माऊली चौक,दत्तनगर) असे आत्महत्या केलेल्या युवकाचे नाव आहे. निलेशच्या आत्महत्येचे कारण समजू शकले नाही. याप्रकरणी अंबड पोलिस ठाण्यात मृत्यूची नोंद करण्यात आली आहे.
वाजे याने रविवारी (दि.६) सायंकाळच्या सुमारास आपल्या राहत्या घरात लोखंडी पाईपाला कापडी पट्टा बांधून गळफास लावून घेतला होता. ही बाब निदर्शनास येताच भाऊ सुनिल वाजे याने त्यास तात्काळ जिल्हारूग्णालयात दाखल केले असता डॉ. अतुल काळे यांनी त्यास उपचारापूर्वी मृत घोषीत केले. याबाबत पोलिस नाईक योगेश अहिवळे यांनी दिलेल्या खबरीवरून पोलिस दप्तरी मृत्यूची नोंद करण्यात आली असून, अधिक तपास हवालदार झोले करीत आहेत.
nashik city crime police laptop theft suicide
