नाशिक (इंडिया दर्पण वृत्तसेवा) – अशोकस्तंभ परिसरात बंद गोडावूनचा कडीकोयंडा तोडून चोरट्यांनी चारचाकी वाहनांचे सुमारे सव्वा लाख रूपये किमतीचे स्पेअरपार्ट चोरुन नेले. याप्रकरणी उमेश चंद्रकांत पंढरपूरकर (रा.राजीवनगर,इंदिरानगर) यांनी तक्रार दाखल केली असून सरकारवाडा पोलिस ठाण्यात घरफोडीचा गुन्हा दाखल करण्यात आला आहे.
पंढरपूरकर यांचा अशोकस्तंभ भागात स्पेअरपार्ट विक्रीचा व्यवसाय आहे. सर्कल सिनेमा थिएटर परिसरात त्यांचे बॉम्बे मोटार स्टोअर्स नावाचे गोडावून असून गेल्या शनिवारी (दि.१९) रात्री अज्ञात चोरट्यांनी त्यांच्या बंद गोडावूनचे कुलूप तोडून ही चोरी केली. गोडावून मध्ये शिरलेल्या चोरट्यांनी सुमारे १ लाख १० हजार रूपये किमतीचे चार चाकी वाहनांचे वेगवेगळे स्पेअरपार्ट चोरून नेले असून अधिक तपास पोलिस नाईक थेटे करीत आहेत.
युवकाची गळफास घेऊन आत्महत्या
२८ वर्षीय युवकाने गळफास घेऊन आत्महत्या केल्याची घटना संभाजी चौकरोडवरील दलूबाभाई कॉलनीत घडली. हरीष बाबुराव शेवाळे (रा.शिवांगी अपा.दलुबाभाई कॉलनी) असे आत्महत्या केलेल्या युवकाचे नाव आहे. शेवाळे याच्या आत्महत्येचे कारण समजू शकले नाही. याप्रकरणी गंगापूर पोलिस ठाण्यात मृत्यूची नोंद करण्यात आली आहे. शेवाळे याने गुरूवारी (दि.३१) दुपारच्या सुमारास अज्ञात कारणातून आपल्या राहत्या घरात गळफास लावून घेत आत्महत्या केली. याबाबत दिपक बोरसे यांनी दिलेल्या खबरीवरून गंगापूर पोलिस ठाण्यात मृत्यूची नोंद करण्यात आली असून अधिक तपास पोलिस नाईक मोरे करीत आहेत.
Nashik City Crime Godown Theft Suicide
