नाशिक (इंडिया दर्पण वृत्तसेवा) – नाशिकरोड येथील गंधर्वनगरी भागात टिव्हीच्या केबलचे काम करीत असतांना पाय घसरल्याने ५१ वर्षीय कर्मचा-याचा इमारतीच्या टेरेसवरून पडल्याने मृत्यू झाला. जितेंद्र माणिक सागवाणी (रा.आकाश सोसा.गंधर्व नगरी,ना.रोड) असे मृत केबल कर्मचा-याचे नाव आहे.
याप्रकरणी उपनगर पोलिस ठाण्यात मृत्यूची नोंद करण्यात आली आहे. सागवाणी शुक्रवारी (दि.२८) सायंकाळच्या सुमारास आपल्या राहत्या इमारतीवरील टेरेसमध्ये केबलचे काम करीत असतांना ही घटना घडली. अचानक पाय घसरल्याने ते पार्किंगमध्ये पडले होते. या घटनेत त्यांच्या डोक्यास व हाता पायास गंभीर दुखापत झाल्याने मुलगा करण सागवाणी याने त्यांना तातडीने जिल्हारूग्णालयात दाखल केले असता वैद्यकीय सुत्रांनी उपचारापूर्वी मृत घोषीत केले. अधिक तपास पोलिस नाईक हिवाळे करीत आहेत.
सातपूरला मोबाईल चोरास तरुणांनी पकडले
मोबाईल हिसकावून पोबारा करणा-या चोरट्या तरूणास पोलिसांनी गजाआ़ड केले आहे. संशयिताच्या अटकेने अनेक गुह्यांची उकल होण्याची शक्यता पोलिस सुत्रांनी वर्तविली आहे. याप्रकरणी सातपूर पोलिस ठाण्यात जबरीचोरीचा गुन्हा दाखल करण्यात आला आहे. विकास चंद्रकांत वाघ (२० रा.नक्षत्र बिल्डींग,मोतीवाला कॉलेज जवळ) असे संशयित मोबाईल चोरट्याचे नाव आहे.
याप्रकरणी भाग्यश्री राजेंद्र मुरकुटे (रा.देवगड सोसा.जुना दत्तमंदिररोड शिवाजीनगर) यांनी तक्रार दाखल केली होती. मुरकटे या बुधवारी (दि.२६) सायंकाळच्या सुमारास कार्बन नाका रस्त्याने मोबाईलवर बोलत आपल्या घराकडे पायी जात असतांना ही घटना घडली होती. म्हसोबा मंदिर परिसरात दुचाकीवर आलेल्या भामट्याने त्यांच्या हातातील सुमारे १२ हजार रूपये किमतीचा मोबाईल हिसकावून पोबारा केला होता. याबाबत पोलिस दप्तरी नोंद होताच पोलिसांनी परिसरातील सीसीटिव्ही यंत्रणेच्या माध्यमातून संशयितास बेड्या ठोकल्या असून अधिक तपास उपनिरीक्षक कातकाडे करीत आहेत.
