नाशिक (इंडिया दर्पण वृत्तसेवा) – घरफोडीत चोरट्यांनी सुमारे पाच लाखाचा ऐवज चोरुन नेला. दिंडोरी रोड परिसरात ही घरफोडीची घटना घडली असून चोरट्यांनी रोकडसह सोन्याचांदीचे दागिने चोरुन नेले. याप्रकरणी म्हसरूळ पोलिस ठाण्यात घरफोडीचा गुन्हा दाखल करण्यात आला आहे.
संजय राजेंद्र श्रीवास्तव (५० रा. मिलेनियम पार्क दिंडोरीरोड) यांनी याप्रकरणी तक्रार दाखल केली आहे. श्रीवास्तव कुटुंबिय बुधवारी (दि.२३) बाहेरगावी गेले असता ही घटना घडली. अज्ञात चोरट्यांनी त्यांच्या बंद घराचे कुलूप तोडून बेडरूममधील कपाटात ठेवलेली रोकड व सोन्याचांदीचे दागिणे असा सुमारे ४ लाख ९७ हजाराचा ऐवज चोरून नेला. अधिक तपास सहाय्यक निरीक्षक पाटील करीत आहेत.
वेगवेगळया भागात दोघांची आत्महत्या
शहरात गुरूवारी वेगवेगळया भागात राहणा-या दोघांनी आत्महत्या केल्याची घटना घडली. या आत्महत्येत ६२ वर्षीय वृध्दाने दुर्धर आजारपणास कंटाळून आत्महत्या केली असून ५८ वर्षीय महिलेचे आत्महत्याचे कारण समजू शकले नाही. याप्रकरणी गंगापूर आणि इंदिरानगर पोलिस ठाण्यात मृत्यूच्या नोंदी करण्यात आल्या आहेत.
पोलिसांनी दिलेल्या माहितीनुसार पहिली घटना पाथर्डी फाटा भागात घडली. लिलाबाई अर्जुन मते (५८ रा.ओमकार अॅनेक्स,मुरलीधरनगर) यांनी गुरूवारी अज्ञात कारणातून विषारी औषध सेवन केल्याचे बोलले जाते. ही बाब निदर्शनास येताच मुलगा देविदास मते यांनी त्यांना तातडीने नजीकच्या वक्रतुंड हॉस्पिटल येथे दाखल केले असता उपचार सुरू असतांना डॉ.सागर मंडलिक यांनी त्यांना मृत घोषीत केले. याबाबत इंदिरानगर पोलिस ठाण्यात मृत्यूची नोंद करण्यात आली असून अधिक तपास हवालदार डोळस करीत आहेत.
दुसरी घटना आनंदवली परिसरात घडली. येथील सुरेश बाळू बोरस्ते (६२ रा.शिवनगर) हे कर्करोगाने त्रस्त होते. गुरूवारी (दि.२४) या दुर्धर आजारपणास कंटाळून त्यांनी आपल्या राहत्या घरी पंख्याच्या हुकास ओढणी बांधून गळफास लावून घेतला त्यात त्यांचा मृत्यू झाला. याबाबत मनोहर महाले यांनी दिलेल्या खबरीवरून गंगापूर पोलिस ठाण्यात मृत्यूची नोंद करण्यात आली असून अधिक तपास पोलिस नाईक बागुल करीत आहेत.
Nashik City Crime Police Theft dacoity murder suicide fight beaten
Dindori Road Anandvali Pathardi Phata
