नाशिक (इंडिया दर्पण वृत्तसेवा) – सिडकोतील संदिप आठवले या युवकाच्या हत्येनंतर खटकी गँग पुन्हा एक गुन्हा दाखल झाला आहे. आठवले यांच्या हत्येपूर्वी या गँगने कॉलेजरोड भागात २२ वर्षीय तरूणास लाकडी दांडक्याने बेदम मारहाण केली होती. त्यात हा युवक गंभीर जखमी झाला होता. खून प्रकरणात हे संशयित पोलिसांच्या जाळयात अडकल्यानंतर या तरुणाने पोलिस स्थानकात तक्रार केली. या हत्येच्या आठवडापूर्वी त्यास बेदम मारहाण करण्यात आल्याचा आरोप त्याने केला आहे. याप्रकरणी गंगापूर पोलिस ठाण्यात मारहाण व दुखापतीचा गुन्हा दाखल करण्यात आला आहे.
ओम प्रकाश पवार उर्फ खटकी, ओम चौधरी उर्फ छोटा खटकी,मॅगी मोरे व प्रणय पगार अशी युवकास मारणा-या संशयितांची नावे आहेत. याप्रकरणी प्रणव प्रभाकर आगळे (२२ रा.संत कबीरनगर,भोसला स्कूल मागे) या युवकाने तक्रार दाखल केली आहे. आगळे गेल्या शुक्रवारी (दि.१८) सायंकाळच्या सुमारास कॉलेजरोड येथील चाय केटली कॅफे येथे बसलेला असतांना संशयितांनी त्यास गाठून मागील भांडणाची कुरापत काढून त्यास शिवीगाळ करीत लाकडी दांडक्याने बेदम मारहाण केली होती. या घटनेत तो जखमी झाला होता. संशयित टोळीची मोठी दहशत असल्याने त्याने अद्याप तक्रार दिली नव्हती. मात्र ही टोळी संदिप आठवले हत्या प्रकरणी पोलिसानी जेरबंद केल्यानंतर संशयितांविरोधात तक्रारींचा पाढा सुरू झाला असून अधिक तपास हवालदार खुळात करीत आहेत.
अल्पवयीन मुलगा बेपत्ता, अपहरणाचा संशय
अल्पवयीन मुलगा रविवार पासून बेपत्ता झाल्यामुळे पालकांनी पोलिस स्थानकात धाव घेतली. जेलरोड परिसरातून हा मुलगा बेपत्ता झाला आहे. त्याचे कुणीतरी अपहरण केल्याचा संशय कुटुंबियांनी व्यक्त केला आहे. याप्रकरणी नाशिकरोड पोलिस ठाण्यात अपहरणाचा गुन्हा दाखल करण्यात आला आहे. संतनरहरी नगर भागात राहणारा अल्पवयीन मुलगा रविवारी सायंकाळी कुणासही काही एक न सांगता घराबाहेर पडला तो अद्याप परतला नाही. सर्वत्र शोध घेवूनही तो मिळून न आल्याने त्याचे अपहरण झाल्याचा संशय व्यक्त होत असून, त्यास कुणी तरी फुस लावून पळवून नेल्याचा अंदाज बांधला जात आहे. अधिक तपास उपनिरीक्षक जितेंद्र माळी करीत आहेत.
Nashik City Crime Police Theft dacoity murder suicide fight beaten
Cidco Khatki Gang Booked Rohit Athawale Murder Case
