नाशिक (इंडिया दर्पण वृत्तसेवा) – पाथर्डी फाटा भागात आर्थिक व्यवहारातून पान स्टॉल चालकावर एकाने प्राणघातक हल्ला केल्याची घटना घडली. या घटनेत पानवाला जखमी झाला असून त्याच्यावर उपचार सुरू आहेत. पोलिसांनी संशयितास अटक केली असून, याप्रकरणी अंबड पोलिस ठाण्यात गुन्हा दाखल करण्यात आला आहे.
संकेत उर्फ चिक्या भालेराव (२१ रा.सिंहस्थनगर सिडको) असे प्राणघातक हल्ला करणा-या संशयिताचे नाव आहे. याप्रकरणी सुशिल भगवतीप्रसाद यादव (४१ रा.माऊलीनगर,पाथर्डीफाटा) यांनी तक्रार दाखल केली आहे. यादव यांचे महामार्गावरील वेलकम हॉटेल परिसरात श्रध्दा पान स्टॉल नावाचे दुकान आहे. संशयिताचे दुकानावर येणे जाणे असल्याने यादव यांनी भालेराव यास हातऊसनवार पैसे दिले होते. त्यातून ही घटना घडली.
सोमवारी (दि.१७) संशयित नेहमीप्रमाणे दुकानावर आला असता यादव यांनी त्याच्याकडे पैश्यांची मागणी केली. त्यामुळे संतप्त झालेल्या संशयिताने शिवीगाळ व जीवे मारण्याची धमकी देत यादव यांच्यावर काही तरी धारदार हत्याराने वार केले. या घटनेत यादव गंभीर जखमी झाले असून त्यांच्यावर परिसरातील वक्रतुंड हॉस्पिटल येथे उपचार सुरू आहेत. यादव यांच्या जबाबावरून पोलिसांनी गुह्याची नोंद करीत सशयितास अटक केली आहे. अधिक तपास उपनिरीक्षक पाडेकर करीत आहेत.
नाशिकरोडला बिअरची बाटली डोक्यात फोडली
नाशिक -पुणे रोडवरील शिवाजीनगर भागात किरकोळ कारणातून दोघा मित्रांना मारहाण करीत एकाच्या डोक्यात बिअरची बाटली फोडल्याची घटना घडली. या घटनेत एक तरूण जखमी झाला आहे. याप्रकरणी रोशन वसंत पगारे (२६ रा.तपोवन डेन्टल कॉलेज मागे पंचवटी) या युवकाने तक्रार दाखल केली असून उपनगर पोलिस ठाण्यात गुन्हा दाखल करण्यात आला आहे.
विकी जावरे व कुणाल पोफळे (रा.दोघे भीमशक्तीनगर,समतानगर) अशी तरूणाच्या डोक्यात बाटली फोडणा-या संशयितांची नावे आहेत. पगारे व प्रशांत वसंत रोकडे (२९ रा.समतानगर,आगरटाकळी) हे दोघे मित्र सोमवारी (दि.१७) रात्री शिवाजीनगर भागात गेले असता ही घटना घडली. रिच वाईन दुकानाजवळ पगारे याचा संशयितांना धक्का लागल्याने ही घटना घडली. गर्दीत संशयितांपैकी एकाचा गॉगल फुटल्याने त्यांनी शिवागाळ करीत पगारे व रोकडे या दोघा मित्रांना मारहाण केली. यावेळी संतप्त एकाने रोकडे याच्या डोक्यात बिअरची बाटली फोडल्याने तो जखमी झाला असून अधिक तपास उपनिरीक्षक पाटील करीत आहेत.
