नाशिक (इंडिया दर्पण वृत्तसेवा) – औद्योगिक वसाहतीतील चुंचाळे शिवारात झोक्यासोबत खेळत असतांना अचानक गळफास लागल्याने दहा वर्षीय मुलाचा मृत्यू झाला. ही घटना घडली. निखील निंबा सैंदाणे (रा.अश्विनीनगर,म्हाडा कॉलनी चुंचाळे शिवार) असे मृत बालकाचे नाव आहे. याप्रकरणी अंबड पोलिस ठाण्यात मृत्यूची नोंद करण्यात आली आहे.
निखील शुक्रवारी (दि.२८) सायंकाळच्या सुमारास आपल्या राहत्या घरात बांधलेल्या झोक्यासोबत खेळत असतांना ही घटना घडली. सुती दोरीच्या झोक्यात अडकल्याने त्यास गळफास लागला होता. ही बाब निदर्शनास येताच आई दिपाली सैंदाणे यांनी त्यास तात्काळ जिल्हा रूग्णालयात दाखल केले असता उपचारापूर्वी वैद्यकीय सुत्रांनी मृत घोषीत केले. अधिक तपास हवालदार चव्हाण करीत आहेत.
सिलेंडर स्फोटात भाजलेल्या महिलेचा मृत्यू
दिंडोरीरोडवरील गुलमोहरनगर भागात गॅस गळतीमुळे झालेल्या सिलेंडर स्फोटात भाजल्याने २७ वर्षीय महिलेचा मृत्यू झाला. ही घटना गेल्या आठवड्यात झाली होती. पुष्पा सुरेंद्र साही (२७ रा. खुशाली विहार,गुलमोहर नगर) असे मृत महिलेचे नाव आहे. याप्रकरणी म्हसरूळ पोलिस ठाण्यात मृत्यूची नोंद करण्यात आली आहे.
साही या गेल्या आठवड्यात आपल्या राहत्या घरात स्वयंपाक करीत असतांना ही घटना घडली होती. या स्फोटात त्या गंभीर भाजल्याने तातडीने जिल्हारूग्णालयात दाखल करण्यात आले होते. गेल्या शनिवारी (दि.२२) त्यांना अधिक उपचारार्थ संजिवणी हॉस्पिटल येथे हलविण्यात आले असता उपचार सुरू असतांना त्यांना डॉ. निखील घोडके यांनी मृत घोषीत केले. अधिक तपास जमादार वाघ करीत आहेत.
