नाशिक – शहर पोलिसांच्या नाकावर टिच्चून चेनस्नॅचर बिनदिक्कतपणे चेनस्नॅचिंग करीत आहेत. त्यातच आता चेनस्नॅचर आता थेट महिलांच्या दारापर्यंत आले आहेत. त्यामुळेच सिडको परिसरात चेन स्नॅचरने घराच्या गेटमधूनच महिलेची सोनसाखळी लांबवली आहे. चेन स्नॅचरचे हे धाडस महिलांमध्ये धडकी भरवणारे आहे.
सिडकोसह शहर परिसरात सोनसाखळी चोरट्यांचा धुमाकूळ सुरू आहे. एकापाठोपाठ एक घटना समोर येत आहेत. त्यामुळे महिलांमध्ये भीतीचे वातावरण पसरले आहे. बुरकुले हॉल पाठीमागच्या ओम कॉलनी परिसरात पत्ता विचारण्याच्या बहाण्याने एका वृद्ध महिलेच्या गळ्यातून पावणे दोन तोळे वजनाचे मंगळसूत्र भरदिवसा लांबवण्यात आले आहे. दुचाकीवरुन आलेल्या अज्ञात चोरट्यांच्या या धाडसाने महिलांमध्ये चिंतेचे वातावरण आहे.
पोलिसांनी दिलेल्या माहितीनुसार, पुनम मनोहर दरेकर (वय 60 वर्षे, रा. गजलक्ष्मी रो हाऊस, ओम कॉलनी) या आज सकाळी अकरा वाजेच्या सुमारास घरासमोर झोपाळ्यावर फोनवर बोलत होत्या. त्यादरम्यान दुचाकीवरून दोन जण त्यांच्या गेटसमोर आले. त्यांनी एक कागद दाखवत पत्ता विचारण्याचा बहाणा दरेकर यांच्याकडे केला. त्याचवेळी या भामट्यांनी दरेकर यांच्या गळ्यातील पावणे दोन तोळे वजनाचे मंगळसूत्र ओरबाडले. तसेच, क्षणार्धात त्यांनी दुचाकीने धूम स्टाईल पोबारा केला. घटनेची माहिती मिळताच अंबड पोलीस ठाण्याचे पोलीस निरीक्षक भगीरथ देशमुख, पोलिस निरीक्षक नंदन बगाडे, गुन्हे शाखेचे सहायक पोलीस निरीक्षक गणेश शिंदे यांच्यासह पोलिस घटनास्थळी दाखल झाले. त्वरित परिसरामध्ये नाकाबंदी करण्यात आली. ही सर्व घटना सीसीटीव्ही मध्ये कैद झाली आहे. सीसीटीव्हीच्या आधारे पोलिस हे सोनसाखळी चोरट्यांचा तपास करत आहेत. बघा हा सीसीटीव्ही व्हिडिओ
https://www.facebook.com/IndiaDarpanLive/videos/1629811580705853/?extid=CL-UNK-UNK-UNK-AN_GK0T-GK1C
