नाशिक (इंडिया दर्पण वृत्तसेवा) – जळगाव जिल्ह्यातील एकाच कुटुंबातील ५ जण नाशिक शहरात झालेल्या कार अपघातात जखमी झाले आहेत. नाशिक शहरातून जाणाऱ्या मुंबई-आग्रा महामार्गावरील उड्डाणपूलावर हा अपघात झाला. भरधाव वेगातील कार पुढे जाणाऱ्या अवजड वाहनावर जोरदार आदळली. याप्रकरणी मुंबई नाका पोलिस स्टेशनमध्ये कार चालकाविरूध्द गुन्हा दाखल करण्यात आला आहे.
मुंबई नाका पोलिसांनी दिलेल्या माहितीनुसार, अपघातात जखमी झालेल्यांमध्ये गणेश दामू जाधव, वसंत दामू जाधव, लता वसंत जाधव,अर्जुन वसंत जाधव व पंकज दिलीप जैन (रा. पाडळसे ता. अमळनेर) अशी जखमींची नावे आहेत. जाधव कुटुंबिय हे मुंबईहून जळगावच्या दिशेने जात होते. नाशिक शहरातील उड्डाणपूलावरुन जात असताना मुंबई नाका परिसरातील मानवता केअर हॉस्पिटल समोर चालकाचा कारवरील (एम एच ०५ एन ०४९३) ताबा सुटला. त्यामुळे भरधाव कार ही पुढे जाणाऱ्या मालवाहू अवजड वाहनावर जोरदारपणे आदळली. या अपघातात जाधव कुटुंबासह कार चालक जखमी झाला. याप्रकरणी गणेश जाधव यांनी तक्रार दिली. त्यानुसार मुंबई नाका पोलीस स्टेशनमध्ये चालक पंकज जैन याच्याविरूध्द गुन्हा दाखल करण्यात आला आहे. तपास सहाय्यक उपनिरीक्षक नजीर शेख करीत आहेत.
