नाशिक (इंडिया दर्पण वृत्तसेवा)- एस.टी.महामंडळाच्या बसचे चाक पायावरून गेल्याने ४८ वर्षीय इसम जखमी झाला. हा अपघात ठक्कर बाजार बसस्थानकात घडला. या घटनेत सदर व्यक्तीच्या पायाचा चेंदामेंदा झाल्याने दिव्यांगत्व प्राप्त झाले असून, याप्रकरणी सरकारवाडा पोलीस ठाण्यात चालकाविरोधात गुन्हा दाखल करण्यात आला आहे.
प्रितीश अरूण बागुल (रा.मुल्हेर ता. सटाणा) असे जखमी व्यक्तीचे नाव आहे. बागुल गेल्या १५ मे रोजी दुपारच्या सुमारास ठक्कर बाजार बसस्थानका आवारातून राजदूत हॉटेलच्या दिशेने पायी जात असतांना हा अपघात झाला होता. प्लॅट फार्म ०३ परिसरात पाठीमागून भरधाव आलेल्या एमएच ०६ एस ८६१६ या बसने त्यास धडक दिली होती.
या अपघातात बसचे चाक पायावरून गेल्याने त्याच्या उजव्या पायाचा चेंदामेंदा झाला होता. उपचारा दरम्यान पोटरी खालील पाय काढावा लागला असून त्यास अपंगत्व प्राप्त झाले आहे. अधिक तपास हवालदार साबळे करीत आहेत.
