नाशिक (इंडिया दर्पण वृत्तसेवा)- नाशिक विमानतळाच्या नवीन धावपट्टीच्या निर्मितीसाठी ३४३ कोटी रुपयांची निविदा प्रसिद्ध करण्यात आली आहे. लवकरच ही निविदा प्रक्रिया पूर्ण होऊन कामाला सुरुवात होणार आहे.
नाशिक विमानतळावर नवीन धावपट्टी निर्माण होण्यासाठी राज्याचे अन्न,नागरी पुरवठा व ग्राहक संरक्षण मंत्री छगन भुजबळ यांचा केंद्र सरकारकडे पाठपुरावा सुरू होता. गेल्याकाही दिवसांपूर्वीच त्यांच्या विशेष प्रयत्नांतून नाशिक विमानतळाच्या नवीन धावपट्टी आणि धावपट्टीच्या निर्मितीसाठी निधी मंजूर करण्यात आला होता. या धावपट्टीच्या कामासाठी आता ३४३ कोटी रुपयांची निविदा काढण्यात आली आहे.
नाशिक शहराची भविष्यातील विमानसेवेची वाढती गरज पाहता विमानतळाची उड्डाणक्षमता वाढवण्यासाठी हिंदुस्तान एरोनॉटिक्सकडून (HAL) सध्या अस्तित्वात असलेल्या धावपट्टीला समांतर अशी नवीन धावपट्टी निर्माण करण्याचा निर्णय घेण्यात आला होता. या नवीन धावपट्टीच्या मंजुरीसाठी मंत्री छगन भुजबळ यांचा केंद्र सरकारकडे सातत्यपूर्ण पाठपुरावा केला होता. तसेच हिंदुस्तान एरोनॉटिक्स लिमिटेडच्या संचालक मंडळाने या नवीन धावपट्टीच्या निर्मितीसाठी निधीलाही मान्यता दिली होती.
नवीन धावपट्टीचे आरेखन व इतर तांत्रिक बाबींसाठी तांत्रिक सर्वेक्षण आणि धावपट्टीचा सविस्तर प्रकल्प अहवाल (DPR) तयार करण्यात आला. हे तांत्रिक सर्वेक्षण पूर्ण झाल्यानंतर धावपट्टी तयार करण्यासाठी निविदा प्रक्रिया सुरू करण्यात आली आहे. या नवीन धावपट्टीच्या निर्मितीनंतर डागडुजी सुरू असतानाही विमानतळ सक्रिय ठेवणे शक्य होणार आहे.
धावपट्टीच्या मंजुरीनंतर अल्पावधीतच ती उभारण्यासाठीची प्रक्रिया सुरू झाली, ही नक्कीच नाशिककरांसाठी आनंदाची गोष्ट आहे. आगामी काळात या धावपट्टीचे काम वेगाने पूर्ण होऊन नाशिककर विमान प्रवाशांच्या सेवेत ही अधिकची धावपट्टी कार्यरत होणार आहे.
