नाशिक (इंडिया दर्पण वृत्तसेवा)– भरधाव दुचाकी घसरल्याने २६ वर्षीय चालकाचा मृत्यू झाला. हा अपघात जत्रा नांदूर लिंकरोडवरील समृध्दी लॉन्स भागात झाला होता. गेल्या तीन दिवसांपासून मृतदुचाकीस्वारावर खासगी रूग्णालायात उपचार सुरू होते. याबाबत आडगाव पोलीस ठाण्यात मृत्यूची नोंद करण्यात आली आहे.
नितीन बन्सीलाल ताडगे (रा.जेवूर ता.मालेगाव) असे मृत दुचाकीस्वाराचे नाव आहे. नितीन ताडगे गेल्या गुरूवारी (दि.१०) सायंकाळच्या सुमारास नाशिकरोडकडून जत्रा हॉटेलच्या दिशेने आपल्या दुचाकीवर प्रवास करीत असतांना हा अपघात झाला होता. जत्रा नांदूर लिंकरोडवरील समृध्दी लॉन्स भागात भरधाव दुचाकी घसरल्याने तो गंभीर जखमी झाला होता.
कुटुंबियांनी त्यास तात्काळ अपोलो हॉस्पिटल येथे दाखल केले होते. रविवारी उपचार सुरू असतांना डॉ. राहूल भामरे यांनी त्यास तपासून मृत घोषीत केले. याबाबत पोलीस दप्तरी मृत्यूची नोंद करण्यात आली असून अधिक तपास हवालदार राजूळे करीत आहेत.
