नाशिक (इंडिया दर्पण वृत्तसेवा)- भरधाव बुलेटने दिलेल्या धडकेत ४८ वर्षीय महिला ठार झाली. हा अपघात दिंडोरीरोडवरील अवधुतवाडी भागात झाला. दुचाकीस्वार आपले वाहन सोडून पसार झाला असून याप्रकरणी पंचवटी पोलीस ठाण्यात दुचाकीस्वाराविरोधात गुन्हा दाखल करण्यात आला आहे.
हिराबाई दत्तू पवार ( रा. पाटील दवाखाना जवळ म्हाडा बिल्डींग, सम्राटनगर दिडोरीरोड) असे मृत महिलेचे नाव आहे. याबाबत मुलगा अनिल पवार यांनी फिर्याद दिली आहे. हिराबाई पवार या गुरूवारी (दि.२८) दुपारच्या सुमारास तारवाला सिग्नलकडून दिंडोरीनाक्याच्या दिशेने पायी जात असतांना हा अपघात झाला.
अवधुतवाडी येथील सप्तशृंगी देवी मंदिरासमोर त्या रस्ता ओलांडत असतांना भरधाव एमएच १५ जीएच १३२३ या बुलेटने त्यांना जोरदार धडक दिली. या अपघातात हिराबाई पवार यांचा मृत्यू झाला असून दुचाकीस्वाराने आपले वाहन सोडून पोबारा केला आहे. अधिक तपास हवालदार पाटील करीत आहेत.