नाशिक (इंडिया दर्पण वृत्तसेवा) – नाशिक महापालिकेच्या लाचखोर शिक्षणाधिकारी सुनीता धनगर यांच्या घरी मोठे घबाड सापडल्यानंतर आता लाचलुचपत प्रतिबंधक विभागाने तिच्या बँक खात्याकडे होरा वळवला आहे. एसीबीने केलेल्या तपासणीत धनगरच्या विविध बँकांमध्ये जबरदस्त घबाड सापडले आहे. हे घबाड पाहून एसीबीे पथकही चक्रावले आहे. त्यामुळे धनगर हिची आता आणखी कसून चौकशी होण्याची चिन्हे आहेत.
नाशिक महापालिकेच्या लाचखोर शिक्षणाधिकारी सुनीता धनगर हिचे उंटवाडी परिसरात आलिशान घर आहे. सिटी सेंटर मॉल सिग्नल जवळील रचित सनशाईन या बिल्डींगमध्ये तिचा आलिशान फ्लॅट आहे. याच आलिशान घराची एसीबीने झाडाझडती घेतली. याच घरात एसीबीच्या हाती मोठे घबाड घेतले. धनगरकडे तब्बल ८५ लाख रुपयांची रोख रक्कम आढळून आली. विशेष म्हणजे ही रक्कम मोजण्यासाठी एसीबीला नोटा मोजण्याचे मशिन मागवावे लागले. मोजणी अंती ते ८५ लाख रुपये निघाले. यात २ हजार रुपयांची एकही नोट आढळून आली नाही.
एसीबीच्या प्राथमिक तपासानुसार, धनगरच्या नावावर २ आलिशान फ्लॅट आणि १ रिकामा प्लॉट आहे. उंटवाडी परिसरातील राहत्या फ्लॅटचीच किंमत जवळपास दीड कोटी रुपये एवढी आहे. धनगरच्या घरी ३२ तोळे सोनेही सापडले आहे. त्यामुळे एसीबीने आता बँक खाते, लॉकर आणि अन्य मालमत्तांची शोधाशोध सुरू केली आहे.
एसीबीने रविवारच्या दिवशी धनगर हिच्या स्टेट बँक खात्याची झडती घेतली. या बँक खात्यात एसीबीला १२ लाख ७१ हजार रुपयांची रक्कम आढळून आली. रविवारी बँक बंद असल्याने एसीबीला बँक खात्यातील रकमेचा तपशील मिळाला नाही. त्यामुळे एसीबीच्या पथकाने आज, सोमवारी (५ जून) अन्य बँक खात्यांची मोठी झडती घेतली. त्यात तब्बल ३० लाख रुपये सापडले आहेत. एसीबीच्या पोलिस अधिक्षक शर्मिष्ठा वालावलकर यांच्या मार्गदर्शनाखाली पोलिस निरीक्षक संदीप घुगे याप्रकरणी अधिक तपास करीत आहेत.
लाचखोर धनगरकडे असलेली माया अशी
आलिशान फ्लॅटची किंमत – सव्वा कोटी रुपये
२ फ्लॅट
१ रिकामा प्लॉट
सोने – ३२२ ग्रॅम
घरामध्ये सापडलेली रोकड – ८५ लाख रुपये
स्टेट बँक खाते क्र १. – १२ लाख ७१ हजार २८ रुपये
स्टेट बँक खाते क्र २. – १५ लाख ९६ हजार २०१ रुपये
स्टेट बँक खाते क्र ३. – ८१ हजार ४३५ रुपये
स्टेट बँक खाते क्र ४. – ३६ हजार २२७ रुपये
नाशिक जिल्हा मध्यवर्ती बँक खाते – ३१ हजार ७२९ रुपये
Nashik ACB Bribe Sunita Dhangar Bank Account Details
