नांदगाव (इंडिया दर्पण वृत्तसेवा) – नांदगाव विधानसभा मतदारसंघाचे अपक्ष उमेदवार समीर भुजबळ हे आज सोमवारी सकाळी १० वाजता नांदगाव येथे उमेदवारी अर्ज दाखल करणार आहे. उमेदवारी अर्ज भरण्यासाठी भुजबळ समर्थक आणि कार्यकर्ते व मतदारसंघातील नागरिकांनी हजारोंच्या संख्येने उपस्थित राहावे असे आवाहन देखील भुजबळ समर्थक आणि भयमुक्त नांदगाव – प्रगत नांदगाव समन्वय समितीने केले आहे.
याबाबत भयमुक्त नांदगाव – प्रगत नांदगाव समन्वय समितीचे विजय पाटील, अरुण पाटील, रतन हलवर दीपक गोगड, आणि विनोद शेलार यांनी दिलेल्या प्रसिद्धी पत्रकात म्हटले आहे की, गेल्या ५ वर्षांपासून मतदासंघांत दडपशाहीचे वातावरण आहे. विकासकामांना मोठी खीळ बसली आहे. जी विकासकामे झाली ती अतिशय निकृष्ट दर्जाची झाली आहेत त्यामुळे नांदगाव भयमुक्त आणि प्रगतशील करण्यासाठी समीर भुजबळ उमेदवारी करत आहेत. ते कोणत्याही पक्षाचे नसून जनतेचे उमेदवार आहेत
समीर भुजबळ हे नाशिकचे खासदार असताना त्यांनी अनेक विकास कामे करून नाशिकचा कायापायलट केला होता. अनेक पथदर्शी प्रकल्प त्यांच्या कार्यकाळात सुरू झाले आहेत. त्यामुळे मतदारसंघातील जनता त्यांच्या पूर्ण पाठीशी आहे. त्यामुळे ते नांदगाव विधानसभा मतदारसंघातून उमेदवारी अर्ज दाखल करतील आणि बहुमताने निवडून येतील असा आम्हाला विश्वास आहे.
समीर भुजबळ यांचा उमेदवारी अर्ज भरण्यासाठी नांदगाव शहरात सकाळी १० वाजता जैन धर्मशाळा मालेगाव रोड येथून शिवाजी चौक, कालिका चौक, महात्मा फुले चौक, डॉ. बाबासाहेब आंबेडकर चौक, जुनी पालिका, अहिल्यादेवी होळकर चौक मार्गे पुन्हा जैन धर्म शाळेजवळ येऊन इथे जाहीर सभा पार पडणार आहे. त्यानंतर काही प्रमुख मान्यवरांच्या उपस्थितीत ते आपला उमेदवारी अर्ज दाखल करतील.
नांदगाव तालुक्यातील कार्यकर्ते व नागरिकांनी हजारोंच्या संख्येने उपस्थित राहावे असे आवाहन भयमुक्त नांदगाव – प्रगत नांदगांव समन्वय समितीच्या वतीने करण्यात आले आहे.
