नांदगाव (इंडिया दर्पण वृत्तसेवा)- समीर भुजबळ यांच्यावर मुंबईसह महाराष्ट्र भर काम करण्याची मोठी जबाबदारी आहे. नेहमीच पडद्याच्या मागे राहून महत्वपूर्ण जबाबदारी पार पाडणारे समीर भुजबळ आता फ्रंटवर येऊन काम करताय. समाजाची सेवा करण्यासाठी आपण सर्वांनी त्यांना आशीर्वाद द्या असे प्रतिपादन राज्याचे अन्न, नागरी पुरवठा व ग्राहक संरक्षण मंत्री छगन भुजबळ यांनी केले. यावेळी मंत्री छगन भुजबळ यांना शुभेच्छा दिल्या.
नवरात्र उत्सव व राष्ट्रवादी काँग्रेस पार्टीचे मुंबई अध्यक्ष तथा माजी खासदार समीर भुजबळ यांच्या वाढदिवसाचे औचित्य साधत राष्ट्रवादी काँग्रेस पार्टीच्या वतीने सुप्रसिद्ध संगीतकार अजय अतुल यांच्या सांज सुरांची मैफिल संगीताची या संगीत सोहळ्याचे नांदगाव येथील एमव्हीपी कॉलेजच्या मैदानावर आयोजन करण्यात आले होते. या सोहळ्याच्या प्रसंगी ते बोलत होते. या सोहळ्यास सुप्रसिद्ध अभिनेत्री रिंकू राजगुरू यांची विशेष उपस्थिती होती. यावेळी डॉ.शेफाली भुजबळ यांच्या हस्ते येवल्याची सुप्रसिद्ध पैठणी भेट देऊन रिंकू राजगुरू यांचा सन्मान करण्यात आला.
यावेळी माजी आमदार पंकज भुजबळ, डॉ.शेफाली भुजबळ, राष्ट्रवादी काँग्रेस पार्टीचे प्रदेश सरचिटणीस दिलीप खैरे, जिल्हाध्यक्ष ऍड.रवींद्र पगार, युवक अध्यक्ष प्रशांत कदम, आनंद सोनवणे, कैलास मुदलीयार, तालुकाध्यक्ष विजय पाटील, रतन हलवर, शहराध्यक्ष अरुण पाटील, दिपक गोगड, समाधान जेजुरकर, अपर्णा देशमुख, प्रसाद सोनवणे, भुजबळ कुटुंबातील सदस्य, यांच्यासह विविध क्षेत्रातील मान्यवर पदाधिकारी, कार्यकर्ते व नांदगावकर बहुसंख्येने उपस्थित होते.
यावेळी मंत्री छगन भुजबळ म्हणाले की, उत्तर महाराष्ट्रात अजय अतुल यांचा पहिल्यांदाच कार्यक्रम होत आहे. महाराष्ट्राचे लाडके अजय अतुल आज आपल्या विनंतीला मान देऊन आपले सादरीकरण त्यांनी केले त्याबद्दल त्यांचे आभार मानले. ते म्हणाले की, समीर भुजबळ यांच्यावर मुंबई राष्ट्रवादी काँग्रेस पार्टीची जबाबदारी असून मुंबईसह महाराष्ट्रात काम करायचे आहे. पहिल्या पासून बॅक स्टेज काम करणारे समीर भुजबळ आता फ्रंटवर येऊन काम करताय. सामाजिक काम पुढे नेण्याच काम आता समीर भुजबळ आणि पंकज भुजबळ यांनी यापुढे अगदी नेटाने करावे. नाशिकसह महाराष्ट्रात काम करतांना गरिबांचे काम करून त्यांचे आशीर्वाद घ्या असेही ते म्हणाले.
यावेळी माजी खासदार समीर भुजबळ म्हणाले की, आजचा होत असलेला हा वाढदिवस अविस्मरणीय आहे. मंत्री छगन भुजबळ व माजी आमदार पंकज भुजबळ यांच्या नेतृत्वाखाली अनेक विकासाची लोककल्याणाची कामे आपण केली. पुन्हा एकदा नाशिक जिल्ह्यात सुख समृध्दी आणि शांतता निर्माण होण्यासाठी आपण आशीर्वाद द्या असे आवाहन त्यांनी उपस्थितांना केले.
यावेळी माजी आमदार पंकज भुजबळ यांनी उपस्थित नागरिकांना नवरात्र उत्सवाच्या शुभेच्छा देत म्हणाले की, बऱ्याच दिवसानंतर आज नांदगावमध्ये आपण एवढा मोठा सांस्कृतिक सोहळा पार पाडत आहे. नागरिकांनी या सोहळ्यास मोठ्या संख्येने उपस्थित राहून भुजबळ कुटुंबियांवर विशेष प्रेम दाखविले त्याबद्दल नांदगाव मतदारसंघातील नागरिकांचे आभार मानतो असे त्यांनी यावेळी सांगितले. तसेच सर्वांच्या वतीने माजी खासदार समीर भुजबळ यांना वाढदिवसाच्या शुभेच्छा दिल्या. यावेळी अजय अतुल यांनी माजी खासदार समीर भुजबळ यांना वाढदिवसाच्या शुभेच्छा दिल्या. याप्रसंगी मंत्री छगन भुजबळ यांच्या हस्ते अजय अतुल यांचा पैठणी शेला देऊन सन्मान करण्यात आला.
यावेळी सांज सुरांची मैफिल संगीताची या संगीत सोहळ्यात सुप्रसिद्ध संगीतकार अजय अतुल ऋषिकेश रानडे यांनी गणेश वंदना, नटरंग उभा, मल्हार वारी, आई भवानी, लल्लाटी भंडार, लक्ख पडला प्रकाश, माय भवानी, वाट दिसुदे, जीव रंगला दंगला, अधीर मन हे झाले, खेळ मांडला, अप्सरा आली, वाजले की बारा यासह विविध गीतांचे सादरीकरण केले. यावेळी नांदगावकरांनी उत्स्फूर्त प्रतिसाद देत त्यांच्या उत्कृष्ट सादरीकरणास मनापासून दाद दिली.
या सोहळ्याच्या प्रारंभी मान्यवरांच्या हस्ते महापुरुषांच्या पुतळ्यास पुष्पहार अर्पण करत सोहळ्यास सुरुवात करण्यात आली. या कार्यक्रमाचे सूत्रसंचालन प्रा.ज्ञानेश्वर दराडे यांनी केले.
फायर शोचे आयोजन
सुप्रसिद्ध संगीतकार अजय अतुल यांच्या संगीताच्या कार्यक्रमानंतर भव्य दिव्य स्वरूपात फायर शोचे आयोजन करण्यात आले होते. उपस्थित नागरिकांनी या फायर शोचा आनंद घेतला.
