इंडिया दर्पण ऑनलाईन डेस्क
नांदेड: बदलापूरच्या शाळेत दोन चिमुकल्या मुलींवर लैंगिक अत्याचार झाल्याची घटना उघडकीस आली. त्या प्रकरणाने संपूर्ण राज्यातील वातावरण ढवळून निघाले. आता या प्रकरणात काँग्रेस प्रदेशाध्यक्ष नाना पटोले यांनी खळबळजनक दावा केला आहे. त्यामुळे या प्रकरणाला पुन्हा एकदा नवे वळण मिळण्याची शक्यता आहे. बदलापूरच्या त्या शाळेत ब्ल्यू फिल्म बनवल्या जायच्या, असा आरोप त्यांनी केला.
नांदेडमध्ये एका जाहीर सभेत ते बोलत होते. महायुती सरकारच्या काळातील राज्यातील परिस्थितीवर भाष्य करताना पटोले यांनी बदलापूरमधील घटनेचा उल्लेख केला. त्या शाळेत ‘ब्ल्यू फिल्म’ तयार केल्या जायच्या, अवयव विक्रीचे काम चालायचे, असा गंभीर आरोप पटोले यांनी केला. ‘ही शाळा राष्ट्रीय स्वयंसेवक संघाशी संबंधित आहे. या शाळेत लहान मुलींच्या अश्लील चित्रफिती तयार करण्याचे, अवयवांची विक्री करण्याचे उद्योग सुरू होते, असा आरोप त्यांनी केला. ती शाळा संघाशी संबंधित असल्यानेच सरकारने या शाळेवर मेहेरबानी केली, असे ते म्हणाले.
बदलापूरात चार-पाच वर्षांच्या मुलींवर अत्याचार झाले. दोनच नव्हे, तर असंख्य मुलींवर अत्याचार झाले. न्यायालयाने चौकशीचे आदेशदेखील दिले; पण शाळा संघाशी संबंधित असल्याने राज्य सरकारनं त्यांच्या संचालक मंडळावर कारवाई केली नाही. माहितीच्या अधिकारातून एका व्यक्तीने माहिती मागितली. त्या शाळेत ब्ल्यू फिल्म फिल्म, पिक्चर तयार करण्याचे, शरीराचे अवयव विकण्याशी संबंधित एक जनहित याचिका करण्यात आली आहे, असे पटोले नांदेडमधील भाषणात म्हणाले.
