नागपुरात तीन दिवसीय खासदार औद्योगिक महोत्सवाचे उदघाटन; काय आहे तो?

नागपूर (इंडिया दर्पण वृत्तसेवा) – विदर्भातील उद्योगाचे विकेंद्रीकरण आवश्यक असून भंडारा-गोंदिया गडचिरोलीसारख्या दुर्गम भागात देखील कृषी तसेच ग्रामीण आधारित व्यवसाय, उद्योग निर्माण झाले पाहिजे, अशी अपेक्षा केंद्रीय रस्ते वाहतूक महामार्ग मंत्री नितिन गडकरी यांनी व्यक्त केली. केंद्रीय सुक्ष्म, लघु आणि मध्यम उद्योग मंत्रालयाच्या अधीन नागपूरच्या एम एस एम ई विकास संस्था तसेच विदर्भातील विविध उद्योजक आणि उद्योग संघटनांच्या सहकार्याने नागपूरच्या हिंगणा एमआयडीसी परिसरात तीन दिवसीय (12 ते 14 मार्च) खासदार औद्योगिक महोत्सवाचे उद्घाटन आज त्यांच्या हस्ते झाले त्यावेळी ते बोलत होत. याप्रसंगी राज्यसभेचे खासदार डॉ. विकास महात्मे, औद्योगिक विकास महामंडळ -एमआयडीसीचे मुख्य कार्यकारी अधिकारी डॉ. अनबलगन, एम एस एम ई विकास संस्थेचे संचालक पी. एम. पार्लेवार प्रामुख्याने उपस्थित होते.

राज्याच्या औद्योगिक विकास महामंडळाने ज्या औद्योगिक एकक किंवा कंपन्यांनी उत्पादन थांबवले आहे त्यांच्या खाली असलेल्या औद्योगिक जागा ज्यांना गुंतवणूक करायची आहे अशांना द्यावेत. या जागाच्या विक्रीसंदर्भात एक धोरण एमआयडीसीने तयार करावे अशी सूचना गडकरी यांनी यावेळी केली . विदर्भात तयार कपडे – गारमेंटचे क्लस्टर तयार व्हावेत, संत्रा कापूस यावर प्रक्रिया तयार होणारे तंत्रज्ञान कौशल्य प्रशिक्षण देण्यात यावे असेही गडकरी यांनी सांगितलं. विदर्भात असणाऱ्या रक्षा उत्पादक कंपन्यांनी वाहन उद्योगाला लागणारे सीएनजी सिलेंडर तसेच सेमीकंडक्टरची निर्मिती केल्यास देशामध्ये या सुट्या भागाचा तुटवडा भासणार नाही. मॅगनीज ओअर इंडिया लिमिटेडने – मॉईलने उत्पादन वाढवण्याची गरज असून देशाच्या गरजेनुसार मॅगनीजचे उत्पादन आवश्यक असल्याचे त्यांनी यावेळी नमूद केले.
ज्याप्रमाणे नागपूर मध्ये खासदार क्रीडा महोत्सव, खासदार सांस्कृतिक महोत्सवाला प्रतिसाद मिळत आहे तसाच प्रतिसाद खासदार औद्योगिक महोत्सवाला मिळेल. पुढच्यावर्षी सर्व उद्योग संघटनांना एकत्र आणून खाद्यप्रक्रिया, संत्रा, कापूस प्रक्रिया अशा विविध क्षेत्रांवर भर देऊन अधिक भव्य स्तरावर या औद्योगिक महोत्सवाचे आयोजन केले जाईल असेही त्यांनी सांगितलं. नागपूरच्या अमरावती रस्त्यावरील डॉ .पंजाबराव देशमुख कृषी विद्यापीठाच्या जागेवर प्रस्तावित असणाऱ्या 180 एकरवरील ‘ऍग्रो कन्व्हेंशन सेंटर ‘ ची सुद्धा त्यांनी माहिती दिली.

Inaugurating ‘Khasdar Audyogik Mahotsav 2022’, Nagpur https://t.co/Bc6InrRDrB

— Nitin Gadkari (मोदी का परिवार) (@nitin_gadkari) March 12, 2022

केंद्रीय मंत्री नितिन गडकरी यांच्या हस्ते याप्रसंगी ‘सर्विसवाला’ ॲपचे तसेच ‘उद्योजक विश्व’ या पत्रिकेचे अनावरण करण्यात आले. एम एस एम ई चे संचालक पी. एम. पार्लेवार यांनी, या तीन दिवसीय महोत्सवात 75 स्टॉल्स लागले असून 25 च्या वर सार्वजनिक क्षेत्रातील केंद्रीय उपक्रमाची दालने आहेत असे सांगितलं. अशा सार्वजनिक क्षेत्रातील उपक्रमांना लागणाऱ्या कच्च्या मालाचा पुरवठा विदर्भातील एम एस एम इ कडून होण्यासाठी वेंडर्सची निर्मिती व उपलब्धता होण्यास हा महोत्सव उपयोगी ठरेल असे पार्लेवार यांनी सांगितले. महाराष्ट्र औद्योगिक विकास महामंडळाचे मुख्य कार्यकारी अधिकारी डॉ .अनबलगन यांनी राज्य शासनाच्यावतीने उद्योग संवर्धनासाठी असलेल्या योजना बद्दल आणि पुढाकाराबद्दल उपस्थितांना माहिती दिली. विदर्भात डिफेन्स एअरो क्लस्टर निर्माण होण्यासाठी आवश्यक त्या सुविधा निर्माण करण्यात येत असून एमआयडीसी बुटीबोरी येथे ‘प्लग एन्ड प्ले ‘ या आधारे डिफेन्स आणि एरोस्पेस मध्ये क्लस्टर स्थापण्यासाठी प्रयत्न केले जात असल्याची माहिती त्यांनी दिली. या महोत्सवामध्ये विविध उद्योग, कंपन्या, सार्वजनिक क्षेत्रातील उपक्रमांचे स्टॉल्स लागले असून या प्रदर्शनाची वेळ ही सकाळी 11 ते सायंकाळी 6 पर्यंत असणार आहे. या कार्यक्रमाला औद्योगिक संघटनांचे प्रतिनिधी, अभियांत्रिकीचे विद्यार्थी, एमएसएमई एमआयडीसीचे अधिकारी उपस्थित होते.

असा आहे महोत्सव आणि त्याचे महत्त्व
हा तीन दिवसीय महोत्सव महाराष्ट्र इंडस्ट्रीज असोसिएशन -एम.आय.ए. हाऊस,पी-28 हिंगणा औद्योगिक क्षेत्र नागपूर येथे होत आहे. विदर्भातील औद्योगिकरणाला चालना देण्यासाठी आणि विदर्भाच्या सर्वांगीण विकासासाठी भव्य प्रदर्शन तसेच राष्ट्रीय विक्रेता विकास कार्यक्रम या महोत्सवात आयोजित करण्यात आला आहे. विदर्भातील एमएसएमई यांना प्रोत्साहन देणे हा या उत्सवाचा मुख्य उद्देश आहे या महोत्सवामध्ये गव्हर्मेंट ई मार्केट प्लेस, वेस्टर्न कोलफिल्ड्स लिमिटेड, मिनरल ऑइल कॉर्पोरेशन लिमिटेड , मॅंगनीज ओर इंडिया लिमिटेड , भारत पेट्रोलियम कॉर्पोरेशन लिमिटेड , इंडियन ऑइल कॉर्पोरेशन लिमिटेड यासारखे विविध सार्वजनिक क्षेत्रातील कंपन्या, औष्णिक विद्युत प्रकल्प, केंद्र आणि राज्य शासनाच्या अंतर्गत असणाऱ्या संस्था तसेच खाजगी संस्था खासदार औद्योगिक महोत्सवात सहभागी झाल्या आहेत.

तीन दिवसीय महोत्सवामध्ये सार्वजनिक क्षेत्रातील केंद्रीय तसेच राज्य शासनाचे उपक्रम यातील अधिकारी तसेच उद्योगाचे प्रतिनिधी तांत्रिक सत्रामध्ये विक्रेता विकास आणि नोंदणी प्रक्रिया तसेच वार्षिक गरजा संदर्भात परिसंवादांमध्ये सहभाग घेतील. एमएसएमई -विकास संस्था तसेच ब्युरो ऑफ इंडियन स्टॅंडर्डचे प्रतिनिधी उद्योजकांसाठी असणाऱ्या या संस्थाच्या योजना स्पष्ट करतील. त्याचप्रमाणे स्टार्ट-अप कॉन्क्लेव्ह, गुंतवणूकदारांची बैठक आणि उद्योजकता जागरूकता कार्यक्रम आयोजित केले जातील. ज्यामध्ये सार्वजनिक क्षेत्रातील मधील अधिकारी यांच्यासोबत संवादात्मक सत्र देखील आयोजित केले जाणार आहेत. सर्व संभाव्य आणि विद्यमान उद्योजक , संशोधन आणि शैक्षणिक संस्था अभियांत्रिकीचे विद्यार्थी यांना या संधीचा लाभ घेण्यासाठी या भव्य महोत्सवात सहभागी होण्याचे आवाहन एम एस एम ई विकास संस्थेचे संचालक पी.एम, पार्लेवार यांच्या वतीने करण्यात आले आहे करण्यात आले आहे.