नागपूर (इंडिया दर्पण वृत्तसेवा) – नागपूर रेल्वे स्थानकात एक विचित्र प्रकार घडल्याचे समोर आले आहे. एका १४ महिन्याच्या चिमुरडीच्या वडिलांनी तिला भलत्याच ट्रेनमध्ये बसवून देत मुलीचे अपहरण झाल्याचा बनाव रचला. विशेष म्हणजे आईचं लक्ष चुकवून या चिमुरडीच्या वडिलांनी हे कृत्य केले आहे. पण पित्याचा हा बनाव फार काळ टिकू शकलेला नाही.
आरोपी पित्याचं नाव कृष्णकुमार राजकुमार कोसले असं असून तो मूळचा रायपूर, छत्तीसगड येथील रहिवासी आहे. त्याला एक मुलगा आणि मुलगी आहे. पत्नीसह तो प्रवास करत होता. त्याची पत्नी गर्भवती आहे. कृष्णकुमार हा चेन्नईला कामाच्या शोधात गेला होता. पण पत्नीच्या प्रसुतीची वेळ जवळ येऊ लागल्याने तो पुन्हा गावी परतत होता. वाटेत तो रात्री नागपूर स्थानकात उतरला. ती रात्र त्याने नागपूर रेल्वे स्थानकात काढली. ७ नोव्हेंबर रोजी ही घटना घडली.
सकाळी सहा – साडे सहा वाजण्याच्या सुमारास पत्नीचे लक्ष नाही हे पाहून कृष्णकुमार कोसले याने डाव साधला. त्याने आपल्या अवघ्या १४ महिन्यांच्या जिज्ञासा या मुलीला उचललं आणि जबलपूर अमरावती एक्स्प्रेसच्या जनरल कोसमध्ये जाऊन बसला. पण जशी गाडी रेल्वे स्थानकातून सुटली, तसा कुष्णकुमार मुलीला एकटीला तिथंच ठेवून गाडीतून खाली उतरला. जेव्हा पत्नीने कृष्णकुमारकडे विचारणा केली तेव्हा एकाने आपल्याला मारहाण करुन जिज्ञासाला पळवून नेल्याचे त्याने सांगितले. यानंतर दाम्पत्य गावी गेलं. तिथे कुटुंबीयांचा संशय बळावला आणि कृष्णकुमार पोलिस तक्रार करण्यासाठी दाम्पत्याने नागपूरचं शांतीनगर पोलीस ठाणं गाठलं.
अखेर आरोपी पित्याचा कट उघडकीस आला. पोलिसांनी केलेल्या चौकशीतून बापानेच हे धक्कादायक कृत्य केल्याच्या बाबीवर शिक्कामोर्तब झाला आहे. पोलिसी खाक्या दाखवताच कृष्णकुमारने आपल्या कृत्याची कबुली दिली आहे. मात्र १४ महिन्याच्या मुलीचा अजूनही शोध लागू शकलेला नाही. सध्या या मुलीचा शोध घेण्याचे आव्हान पोलिसांसमोर उभे आहे. पोलिसांनी या मुलीचे छायाचित्र प्रसिद्ध केले असून ही चिमुकली कुठे दिसली तर नागपूर पोलिसांना कळवावे, असे आवाहन करण्यात आले आहे.
Nagpur Crime Father Fly Away 14 Year Girl Drop in Railway
