नागपूर (इंडिया दर्पण वृत्तसेवा) – राज्याचे उपमुख्यमंत्री देवेंद्र फडणवीस यांना दोन गुन्ह्यातून नागपूरच्या जिल्हा व सत्र न्यायालयातील प्रथम श्रेणी न्यायदंडाधिकाऱ्यांनी दोषमुक्त केले. २०१४ च्या निवडणुकीतील शपथपत्रावर हा निकाल आला आहे. निवडणूक शपथपत्रात दोन गुन्ह्यांची नोंद नसल्याच्या प्रकरणाची सुनावणीत न्यायालयाने हा निकाल दिला आहे. फडणवीस यांच्याविरोधातील दोन गुन्हे हे खाजगी स्वरुपाच्या होते. जे गुन्हे लपवले त्याचा निवडणुकीवर कोणताही परिणाम होणार नसल्याने फडणवीसांना दोषमुक्त करण्यात आल्याचे न्यायालयाने सांगितले. सुनावणीसाठी देवेंद्र फडणवीस हे ऑनलाईन पद्धतीने न्यायालयीन कामकाजात सहभागी झाले होते.
देवेंद्र फडणवीस यांचा गेल्या नऊ वर्षांत मुख्यमंत्री-विरोधीपक्षनेता-उपमुख्यमंत्री असा प्रवास झाला. पण तरीही २०१४ च्या निवडणुकीतील एक प्रकरण त्यांचा या प्रकरणाने पिच्छा सोडला नाही. हे प्रकरण निवडणूक शपथपत्रात गुन्ह्यांची माहिती लपविण्याच्या संदर्भातील होते. गेल्या नऊ वर्षांत यावर अनेकदा सुनावणी झाली. आज न्यायालयाने निकाल दिला.
२०१४ मध्ये झालेल्या विधानसभा निवडणुकीसाठी दाखल केलेल्या उमेदवारी अर्जासोबतच्या शपथपत्रात फडणवीस यांनी त्यांच्याविरुद्ध दाखल दोन गुन्ह्यांची माहिती दडवली, असा दावा करणारी याचिका अ‍ॅड. सतीश उके यांनी दाखल केली आहे. याप्रकरणी अगोदरच प्रथम श्रेणी न्याय दंडाधिकारी संग्राम जाधव यांनी सर्व पक्षांची बाजू ऐकूण घेत निर्णय राखून ठेवला. यावर त्यांनी आज निर्णय दिला. सुनावणीदरम्यान देवेंद्र फडणवीस यांचे वकील सुबोध धर्माधिकारी यांनी सांगितले की ‘नजर चुकीने हे गुन्हे शपथपत्रात नमूद करण्याचे राहून गेले होते. गुन्ह्यांविषयी माहिती न देण्याचा कोणताही वाईट उद्देश नव्हता. तसेच प्रत्येक निवडणूकीला फडणवीस यांना मिळणाऱ्या मतदानाची संख्या ही वाढतच आहे.’ देवेंद्र फडणवीस यांच्यातर्फे अ‍ॅड. सुबोध धर्माधिकारी, अ‍ॅड. उदय डबले, अ‍ॅड. देवेंद्र चव्हाण यांनी बाजू मांडली तर अ‍ॅड. सतीश उके यांनी कारागृहातून व्हिडियो कॉन्फरन्सद्वारे बाजू मांडली होती.
State Deputy Chief Minister Devendra Fadnavis acquitted in election affidavit case
Nagpur Court Order Devendra Fadnavis Election Affidavit Politics BJP
