नागपूर (इंडिया दर्पण वृत्तसेवा) – येथील कपिलनगरातील दोन वर्षीय चिमुकल्याचा गॅलरीतून पडून मृत्यू झाल्याची दु:खद घटना पुढे आली आहे. शेख अहफाज असे या मुलाचे नाव आहे. तो घराच्या गॅलरीत खेळत होता. खेळता-खेळता पाचव्या मजल्यावरून त्याचा तोल गेल्याने मृत्यू झाला.
कपिलनगर पोलिस ठाण्याच्या हद्दीतील अशोकनगर उप्पलवाडी येथे ही घटना घडली आहे. दोन वर्षांचा अहफाज हा इमारतीत पाचव्या मजल्यावर असलेल्या घराच्या गॅलरीत खेळत होता. खेळता खेळता अचानक अहफाजचा तोल गेल्याने तो पाचव्या मजल्यावरून खाली पडला. त्यानंतर अपघातस्थळी उपस्थित असलेल्या नागरिकांनी त्याला तातडीने मेडिकलमध्ये भरती केले. पाचव्या मजल्यावरून खाली पडल्याने अहफाजच्या डोक्याला गंभीर दुखापत झाली होती. त्यामुळे उपचारादरम्यान त्याचा मृत्यू झाला. या घटनेने संपूर्ण नागपुरात हळहळ व्यक्त होत आहे.
एकुलता एक मुलगा
अहफाज त्याच्या आई-वडिलांचा एकुलता एक मुलगा होता. दोन वर्षांचा असला तरीही त्याच्या असंख्य आठवणी त्यांच्यासोबत आहेत. त्यामुळे त्याच्या मृत्यूची बातमी कानावर पडताच आई-वडिलांवर दुःखाचा डोंगर कोसळला. आई तर सतत अहफाजच्या नावाने टाहो फोडत होती.
घरातच खेळत होता
अहफाज पहिले घरातच खेळत होता. त्याच्या आई-वडिलांचे त्याच्याकडे लक्षही होते. पण खेळता खेळता तो कधी बाल्कनीत गेला, कुणालाच कळले नाही. बाल्कनीत खेळतानाच त्याचा तोल गेला आणि थेट खाली पडल्यावरच घरातील लोकांना कळले.
Nagpur 2 Year Boy Death Fifth Floor Gallery Fallen Down
