इंडिया दर्पण ऑनलाईन डेस्क
अभिनेते नाना पाटेकर यांनी उपमुख्यमंत्री एकनाथ शिंदे यांच्या दरे गावात शनिवारी विविध कार्यक्रमाला उपस्थितीत लावली. यावेळी त्यांनी एकनाथ शिंदे यांच्या शेतात फेरफटका मारून विविध पिकांची केलेली लागवड बघीतली. यावेळी दोघांनी मिळून अननसाचे झाडही लावले. तसेच त्यांनी शेतात पिकलेली स्ट्रॉबेरी, चिकू, आंबे यांसारख्या विविध फळांचा मनसोक्त आस्वादही घेतला. शेती आणि मातीशी नाळ जोडलेल्या नानांसोबत यावेळी शिंदे यांनी गप्पा मारल्या.
नाम फाउंडेशन, टाटा मोटर्स आणि राज्य शासनाच्या पुढाकाराने कोयना नदीपात्रात राबविण्यात येणाऱ्या ‘गाळमुक्त धरण आणि गाळयुक्त शिवार’ या योजनेच्या कामाचा शुभारंभ शनिवारी करण्यात आला. यावेळी नाम फाउंडेशनचे सर्वेसर्वा, अभिनेते नाना पाटेकर हेदेखील उपस्थित होते.
या योजनेच्या माध्यमातून कोयना धरणातील गाळ जेसीबीच्या सहाय्याने काढण्यात येत असून त्यामुळे या धरणाची पाणी वहन करण्याची क्षमता वाढत असल्याचे गेल्या काही वर्षात निदर्शनास आले आहे. नाना पाटेकर यांच्या नाम फाउंडेशनने केलेल्या कामामुळे कोकणाप्रमाणेच कोयना पात्रातील पाणी पातळीत लक्षणीय वाढ झाली आहे. यावेळी नाम फाउंडेशनचे सदस्य आणि दरे गावातील शिंदे यांचे सर्व सहकारी उपस्थित होते.
