मुंबई (इंडिया दर्पण वृत्तसेवा) – राज्य सरकारने आज काही महत्त्वपूर्ण निर्णय घेतले आहेत. त्यात वर्सोवा-वांद्रे सी लिंकचे नाव बदलण्यात आले आहे. आता हा रस्ता वीर सावरकर सेतू म्हणून ओळखला जाईल. याशिवाय मुंबई ट्रान्स हार्बर लिंकचे नाव बदलून अटल बिहारी वाजपेयी स्मृती न्हावा शेवा अटल सेतू असे करण्यात आले आहे. गेल्या महिन्यात वीर सावरकर जयंतीच्या दिवशी महाराष्ट्र सरकारने याबाबत निर्णय घेतला होता.
यापूर्वी केंद्र सरकारने फेब्रुवारीमध्ये औरंगाबाद आणि उस्मानाबादच्या बदललेल्या नावांना मंजुरी दिली होती. आता औरंगाबाद हे छत्रपती संभाजीनगर आणि उस्मानाबाद हे धाराशिव म्हणून ओळखले जाते. उपमुख्यमंत्री देवेंद्र फडणवीस यांनी ट्विटरवर ही माहिती दिली आहे. औरंगाबादचे नाव मुघल शासक औरंगजेबाच्या नावावर ठेवण्यात आले होते, तर उस्मानाबादचे नाव २० व्या शतकातील हैदराबाद संस्थानाच्या शासकाच्या नावावरून ठेवण्यात आले होते.
छत्रपती शिवाजी महाराजांचे ज्येष्ठ पुत्र छत्रपती संभाजी हे त्यांच्या वडिलांनी स्थापन केलेल्या मराठा साम्राज्याचे दुसरे शासक होते. औरंगजेबाच्या आदेशानुसार १६८९ मध्ये संभाजी महाराजांना फाशी देण्यात आली. काही अभ्यासकांच्या मते, उस्मानाबादजवळील धाराशिव ही लेणी आठव्या शतकातील आहे. हिंदू उजव्या विचारसरणीच्या संघटना या दोन शहरांच्या नामांतराची मागणी बऱ्याच दिवसांपासून करत होते.
महाराष्ट्राचे मुख्यमंत्री एकनाथ शिंदे यांनी सांगितले की, राज्य सरकारने सावरकर जयंती ही वीर सावरकर गौरव दिन म्हणून साजरी करण्याचा निर्णय घेतला आहे. वांद्रे-वर्सोवा सागरी सेतूला वीर सावरकरांचे नाव देण्याची घोषणाही सरकारने केली होती. विविध क्षेत्रात उल्लेखनीय कार्य करणाऱ्या व्यक्तींना वीर सावरकर शौर्य पुरस्कार देण्याचा निर्णयही घेण्यात आला.
विरोधकांवर निशाणा साधला
देशाच्या नवीन संसद भवनाच्या उद्घाटनाबाबत मुख्यमंत्री म्हणाले की, लोकशाहीच्या पवित्र मंदिराचे उद्घाटन वीर सावरकर यांच्या जयंतीदिनी करण्यात आले. सर्व लोकांसाठी ही ऐतिहासिक घटना होती. देशातील १४० कोटी जनता यात सहभागी झाली आणि सर्व जनतेने यात सहभागी व्हायला हवे होते. त्यांचा इशारा विरोधी पक्षाकडे होता.
