इंडिया दर्पण ऑनलाईन डेस्क – २००८ च्या मुंबई दहशतवादी हल्ल्याचा सूत्रधार साजिद मीर याला पाकिस्तानने ताब्यात घेतले आहे. यापूर्वी, एफबीआयने मोस्ट वाँटेड घोषित केलेल्या साजिदच्या मृत्यूचा दावा पाकिस्तानी गुप्तचर संस्था आयएसआयने केला होता. तज्ज्ञांच्या मते, FATF च्या ग्रे लिस्टमधून बाहेर पडण्यासाठी पाकिस्तान मीरला शिक्षा देण्याचे नाटक करत आहे.
निक्केई एशियाच्या अहवालानुसार, एफबीआयच्या एका अधिकाऱ्याने सांगितले की, मीर जिवंत आहे, तो पाकिस्तानात कोठडीत आहे आणि त्याला शिक्षा झाली आहे. २०११मध्ये, मीरला एफबीआयने त्याच्यावर ५ दशलक्ष डॉलर बक्षीस देऊन मोस्ट वॉन्टेड यादीत समाविष्ट केले होते. अमेरिका आणि भारत हे दोघेही दशकभरापासून त्याचा शोध घेत आहेत. लष्कराचा म्होरक्या हाफिज सईदचा जवळचा साजिद हा मुंबई हल्ल्याचा सूत्रधार डेव्हिड कोलमन हेडली आणि इतर दहशतवाद्यांचा हस्तक असल्याचे मानले जाते.
पाकिस्तानचा खरा हेतू
साजिद मीरच्या अटकेने पाकिस्तानला दाखवायचे आहे की ते दहशतवादाविरोधात काम करत आहेत. या अटकेला FATF च्या ग्रे लिस्टमधून बाहेर पडण्याचा प्रयत्न मानले जात आहे. पाकिस्तान जून २०१८ पासून FATF च्या ग्रे लिस्टमध्ये आहे. यावेळी जर्मनीमध्ये झालेल्या बैठकीत FATF ने ग्राउंड चाचण्या घेतल्यानंतर पाकिस्तानला ग्रे लिस्टमधून बाहेर काढण्याचा निर्णय घेतला जाईल, असे सांगितले होते. अशा परिस्थितीत पाकिस्तान दहशतवादाविरोधात उघडपणे काम करत असल्याचे दाखवू इच्छित आहे.
साजिद हा लख्वीचा सुरक्षा प्रमुख
साजिद मीर २०१० पर्यंत लष्कर – ए- तोयबाचा ऑपरेशन प्रमुख झकी – उर – रहमान लख्वीच्या सुरक्षेची जबाबदारी सांभाळत होता. त्याने परदेशात दहशतवाद्यांची भरती तर केलीच पण पाकिस्तानात दहशतवादी तळही चालवले. आयएसआयच्या इंडियन मुजाहिदीन ऑपरेशनमध्येही तो भाग होता, ज्याला कराची प्रकल्प म्हटले जाते.
mumbai attack 26/11 master mind terrorist sajid mir alive pakistan
