कल्याण (इंडिया दर्पण वृत्तसेवा) – मुंबई-नाशिक महामार्गावर भिवंडी तालुक्यात आज सकाळी भीषण अपघात झाला आहे. खडवली गाव क्रॉसिंगवर कंटेनरने काळी-पिवळी जीपला जोरदार धडक दिली. या अपघातात जीपमधील ४ विद्यार्थी जागीच ठार झाले आहेत. हा सर्व प्रकार महामार्गालगतच्या सीसीटीव्ही कॅमेऱ्यात कैद झाला आहे. या अपघातात ५ जण जखमी झाले असून त्यांना उपचारार्थ रुग्णालयात दाखल करण्यात आले आहे.
खडवली क्रॉसिंगच्या ठिकाणी काळी पिवळी जीप ही खडवली स्टेशनकडे जात होती. त्याचवेळी मुंबईच्या दिशेने जाणाऱ्या भरधाव कंटेनरने जीपला जोरदार धडक दिली. यामुळे जीप तब्बल ६० ते ७० फूट दूर फेकली गेली. या अपघातात जीपमधील ४ विद्यार्थ्यांचा मृत्यू झाला आहे तर ५ जण जखमी झाले आहेत. जीप चालक गंभीर जखमी आहे. त्याला कळवा येथील रुग्णालयात उपचारार्थ दाखल करण्यात आले आहे.
पोलिसांनी या अपघाताची दखल घेत तातडीने घटनास्थळी धाव घेतली. मदतकार्य सुरू केले. कंटेनरचालकाला पकडण्यात आले आहे. पोलिस अधिक तपास करीत आहेत.
