नाशिक (इंडिया दर्पण वृत्तसेवा) – कॅनडा येथे आंतरराष्ट्रीय मुख्यालय असलेल्या कोल-सेमका (कॉमनवेल्थ ऑफ लर्निंग – कॉमनवेल्थ एज्युकेशनल मिडिया सेंटर फॉर एशियाचे (COL-CEMCA – Commonwealth Educational Centre For Asia) नवी दिल्ली येथील राष्ट्रीय कार्यालय व यशवंतराव चव्हाण महाराष्ट्र मुक्त विद्यापीठ यांच्या संयुक्त विद्यमाने येथे आजपासून देशभरातील सर्व मुक्त विद्यापीठांच्या कुलगुरूंची चौथी दोन दिवशीय गोलमेज परिषद आयोजित करण्यात आलेली आहे. विद्यापीठाच्या ‘यश-इन आंतराष्ट्रीय परिषद केंद्रात (यश-इन इंटरनॅशनल कन्व्हेन्शन सेंटर) होत असलेल्या या परिषदेत देशभरातील १७ मुक्त विद्यापीठांचे कुलगुरू, राष्ट्रीय व राज्य स्तरावरील वरिष्ठ शिक्षण अधिकारी सहभागी होणार आहेत. मुक्त व दूरशिक्षण पद्धतीच्या विद्यापीठांमध्ये राष्ट्रीय शैक्षणिक धोरण – २०२० च्या ऑफलाईन आणि ऑनलाईन अंमलबजावणीचा यशमार्ग’ (पाथवे फॉर द इम्प्लेमेंटेशन ऑफ एनईपी-२०२० इन ओडीएल युनिव्हर्सिटीज : ऑफलाईन आणि ऑनलाईन मोड – Pathway for the Implementation of NEP-2020 in ODL Universities : Offline and Online Mode) या विषयावर ही परिषद होईल.
परिषदेच्या पहिल्या दिवशी गुरुवार दिनांक ६ मार्च रोजी सकाळी यशवंतराव चव्हाण महाराष्ट्र मुक्त विद्यापीठाचे माननीय कुलगुरू प्रा. संजीव सोनवणे यांच्या स्वागतपर भाषणाने या परिषदेची सुरुवात होईल. कोल–सेमकाचे संचालक डॉ. बी. शद्रच हे अहमदाबाद येथे झालेल्या देशभरातील मुक्त विद्यापीठांच्या कुलगुरुंच्या प्रथम परिषदेतील घोषणापत्राची माहिती देवून या चौथ्या गोलमेज परिषदेची उद्दिष्टे स्पष्ट करतील. उद्घाटन कार्यक्रमास भारत सरकारचे उच्च शिक्षण विभागाचे सचिव डॉ. विनीत जोशी (नवी दिल्ली) व यूजीसी-डीईबीचे संयुक्त सचिव डॉ. मधुकर वावरे (नवी दिल्ली) हे ऑनलाइन पद्धतीने प्रमुख अतिथी म्हणून मार्गदर्शन करणार आहेत. त्यानंतर आशियाई मुक्त विद्यापीठांमध्ये कौशल्य आणि रोजगारक्षमतेसाठीचे सर्वोत्तम उपक्रम याविषयी बांगलादेश, चीन, पाकिस्तान व श्रीलंका येथील मुक्त विद्यापीठांचे कुलगुरू ऑनलाइन पद्धतीने सादरीकरण करतील. ‘मुक्त विद्यापीठांमधील पदवीधर रोजगारक्षमता प्रकल्प’ याविषयी एम.पी. भोज मुक्त विद्यापीठ (भोपाळ) चे कुलगुरू प्रा. संजय तिवारी माहिती देतील.
दुसऱ्या दिवशी शुक्रवार दिनांक ७ मार्च रोजी प्रथम सत्रात सकाळी अहमदाबाद घोषणापत्रातील ठळक मुद्द्यांविषयी अहमदाबादच्या डॉ. बाबासाहेब आंबेडकर मुक्त विद्यापीठाचे कुलगुरू प्रा. अमित उपाध्याय उहापोह करतील. त्यानंतर या घोषणेतील महत्वाच्या प्रत्येक मुद्द्यावर शिफारशी आणि उद्दिष्टेच्या अनुषंगाने उत्तर प्रदेशच्या राजश्री टंडन मुक्त विद्यापीठाचे कुलगुरू प्रा. सत्यकाम यांच्या अध्यक्षतेखाली खुले चर्चासत्र होईल. त्यानंतर मुक्त विद्यापीठांच्या संघटनेची स्थापना करण्याविषयी हैदराबादच्या डॉ. बाबासाहेब आंबेडकर मुक्त विद्यापीठाचे माजी कुलगुरू प्रा. सितारामा राव ऑनलाईन प्रस्ताव सादर करतील. या प्रस्तावातील कृतीयोग्य पावले ओळखण्यासाठी आणि जबाबदाऱ्या नियुक्त करण्यासाठी अधोरेखित केलेल्या प्रत्येक मुद्द्यावर उत्तराखंड मुक्त विद्यापीठाचे कुलगुरू प्रा. ओ. पी. एस. नेगी यांच्या नेतृत्वात चर्चा होईल. दुपार सत्रात ‘मुक्त विद्यापीठांच्या संघटनेचे प्रशासन’ याविषयी आसामच्या के. खांडिकी राज्य मुक्त विद्यापीठाचे कुलगुरू प्रा. राजेंद्र प्रसाद दास यांच्या नेतृत्वात खुले चर्चासत्र होईल. त्यानंतर यशवंतराव चव्हाण महाराष्ट्र मुक्त विद्यापीठाची गुणपत्रक संबंधी ब्लॉक-चेन पद्धत आणि यश कार्डच्या सर्वोत्तम पद्धती, स्क्रीन मूल्यांकन याविषयी माहिती देण्यात येईल. त्यानंतर ‘उच्च शिक्षणातील डिजिटल उपक्रम’ याविषयी महाराष्ट्र ज्ञान महामंडळ लिमिटेड (एमकेसीएल) पुणेचे मुख्य मार्गदर्शक श्री. विवेक सावंत व वरिष्ठ महाव्यवस्थापक श्री. अमित रानडे माहिती देतील. तिसऱ्या सत्रात उपस्थित सर्व कुलगुरू आपले मनोगत व्यक्त करतील. पाठोपाठ कोल–सेमकाचे संचालक डॉ. बी. शद्रच हे मुक्त विद्यापीठांची भावी वाटचाल विषयी मार्गदर्शन करतील. अंतिम सत्रात महाराष्ट्र राज्य सरकारच्या उच्च शिक्षण विभागातील संचालक डॉ. शैलेंद्र देवळाणकार समारोपाचे भाषण करतील. यशवंतराव चव्हाण महाराष्ट्र मुक्त विद्यापीठाचे प्र-कुलगुरू डॉ. जोगेंद्रसिंह बिसेन आभार प्रदर्शन करतील. विद्यापीठाच्या अंतर्गत गुणवत्ता आश्वासन केंद्रातर्फे (Centre for Internal Quality Assurance – CIQA-सिका) या परिषदेचे संयोजन करण्यात आले आहे.
